Aizawl: Kar hmasa tir lam atanga Mizoram hmun hrang hranga fur ruah sur nain harsatna a thlen nasa a, thi awm lo mah se thil tam tak a tihchhiat bakah khualzin eng emaw zatin harsatna an tawk.
Lunglei atanga Lawngtlai panna kawngpui chu Bualte daiah lei min nasa tak avangin hun engemaw chen kal hleih theih a ni lo a, leimin hi khawl hmanga then ni thin mah se ruah a sur hlek chuan a min belh zel a. Hei vang hian khualzin mi engemaw zat chu Bualte khuaah an tangkhang a, lirthei hi tlang thei tawh mah se ruah a tlak zel chuan puing leh thei a ni.
Kar hmasa tir atanga ruah sur vang hian Khawthlangtuipui chuan a chim chin a sangah Tlabung khuaa chhungkaw thenkhat chu an insuan chhuak a, lei min hian chenna in thenkhat a tihchhiat bakah luah ngam lohin in thenkhat a awm a. Tui lian leh lei min vanga harsatna tawkte chhawmdawl hna hi VC leh tlawmngai pawlten thawkin YMA hall leh hmun remchang dangah te awmtir rih an ni.
Tui lian avang hian Tlabung leh a chhehvela chhungkaw 100 velte chuan an chenna in chhuahsanin Trade & Facilitation Centre-ah leh middle school bakah hmun remchang dangah te awmtir an ni.
Inrinni kha chuan tui hi a kam hret a; mahse, ruah a sur zel chuan tui hi lian zel thei niin an sawi a. West Tuipui bialtu MLA Prova Chakma chuan ruah sur vanga harsatna tawkte hi buhfai leh ei tur a sem.
Lunglei-ah pawh ruah sur vang hian chhiatna hrang hrang a thleng a, Theiriat ah ruah sur vang hian leimin awmin hun engemaw chen kawng a ping a. Theiriat YMA chuan khualzin tangkhang te hi ei tur an pe a. Zobawk North-a C.Lalbiaka in bula retaining wall chu Nilaini tlai khan a chim a, in hi kawngpui atangin kailawn dawh luh ngai a ni a. Mahse, a inngahna a chim avang hian chhuak thei lovin hun engemaw chen an awm phah a ni.
Ruah sur vang hian Lunglei khawpui tui lakna pawhin harsatna an tawk a, duh angin PHE-ten tui an sem thei lo nia thudawn a ni a. Serchhip lamah pawh Mat lui tui lian vangin Mat phai, Zawlpui-a thlai chinna hmun eng emaw zat chu tui hian a chim a, helai hmuna thlai chin hrang hrang zikhlum, hmarchapui, bawkbawn, buh leh thlai dang dang chinna hmun te chu tui hian a chim nia thudawn a ni.
Aizawlah pawh ruah sur vang hian harsatna a thleng nual a, Ngaizel kham, K.Lalnghakliana filling station bul kawng chhak atanga lung tla chuan hun eng emaw chen kawng a hnawh a. Lung tla hian kawng sira bus, taxi, scooter, bike, pick-up leh tank lorry te a delh a, city bus driver pakhat leh conductor-in hliam an tuar.
Ruah sur nasain Aizawl khawpui tui lakna Tlawng lui a tihnut nasat avangin PHE tuisem a khaihlak nia thudawn a ni bawk.