MIXI Global Investments (MGI) report thar tihchhuahin a tar lan danin India-a mobile gaming market chu hmasawnna hmun tharah a lut mek a. Game khel thinte sum hman tam tak leh gaming genre hrang hranga tui thar sawtna hian kum 2029-ah chuan industry revenue hi $ tluklehdingawn 2.4-ah a hruai thlen beisei a ni.
‘India’s State of Play’ tia vuah report hi Naavik siam a ni a, Sensor Tower tichangtlungin, AppsFlyer-in a thlawp a ni a. Chhut lawk danin in-app purchase (IAP) leh fakna (advertising) atanga sum lut zawng zawng hian kum 2025 khan $ tluklehdingawn 1.1 vel a kai a, kum 2026-ah $ tluklehdingawn 1.5-ah chhovin kum 2029-ah phei chuan $ tluklehdingawn 2.4 a tlin beisei a ni.
India chu khawvela gaming market lian ber berte zinga la tling chhunzawm zelin, kum 2025 khan game khel active tak mi maktaduai 600 vel an awm a, hei hi a hma kum lakah 9%-in a pung.
Kumin chhung hian mobile game download pawh tluklehdingawn riat dawn zeta tam niin a la nghet hle a, khawvel pumah China dawt chiah a ni.
Game download zat hi tun hnaiah a rualkhai viau laiin kum 2020 atang khan in-app purchase atanga sum lut hi a hma aiin a let hnih aia tamin a pung a, hei hian India-a game khel thinte atanga sum lak luh a that chhoh zelzia a nemnghet.
Kum tam tak chhung chu India-a gaming revenue hi genre pakhatah chauh a bet ber a. Shooter title te, Free Fire MAX leh Battlegrounds Mobile India te hmahruaina hnuah in-app spending-a hmun lian ber la luah zelin a vai phei chuan 43% vel a ni.
Tun hnaia danglamna lo awm ta chu he hmasawnna lo chhuahna hmun hi a ni a. Strategy game-te chu hmuh hmaih rual lohin an langsar a, 4X subgenre phei chu kum hnih chhungin 77%-in a thang a, niche thar dangte phei chu an thang chak lehzual.
MOBA revenue chu a hma aiin a let thumin a pung a, card battler-te pawh 90% aia tam an thang a. Geolocation chu kum 2025-a sum lak luh hnem lama thang chak ber genre a ni a, tual chhung live operation-te avanga 75%-ah chho niin simulation pawh Roblox hlawhtlinna kum vangin a rawn chho hle bawk.
Sum lak luh hi category pakhatah chauhah a innghat ta lo va, category dang tam takah a darh zau tawh a ni.
India-a game khel thinte hi a tlangpuiin an la naupangin mipa an la tam ber a; mahse, a huang erawh a zau tial tial a. Puzzle game-te hian hmeichhia kheltu mi 45% vel an hip tawh a, lifestyle title lamah hmeichhia leh mipa an inzat thuak tawh a, puzzle khel thinte phei chu upa lam deuh an ni tawh a, a kheltute zinga a chanve aia tam hi kum 35 leh a chung lam an ni.
“India chu hun eng emaw chen khawvela game khel tamna ber pakhat a lo ni tawh a; mahse, tun hnaia data-in a tar lan dan chuan market hi a lo puitling chho zel a, revenue a thuk tawh a, hmasawnna hi genre hrang hrangah a darh a, game kheltute pawh chi hrang hrang an awm tawh a. Kha scale leh diversification inrem khawm kha a ni tun hun thlir tula siamtu chu,” tiin MIXI Global Investments-a Investment Managing Director Tomoharu Urabe chuan a sawi.
Data hrang hrang atanga a lan danin tual chhung hnam ziarang nena inzawmna nei game-te hian khawvel pumin an hriat larte thlen chinah an chungnung hle a. Ludo King leh Cricket League-te chu download chart-ah hmahruaitu an ni a, kum 2025-a game download tam ber 10 zinga panga ngawt chu India studio-te siam an ni.
Khawvel puma hlawhtling game-te chu tual chhung nena inrem tura siam danglamna thuk tak te, phone changkang lo zawk tana siam rem India-specific version-te, tual chhung live event te leh tual chhung esports-te vangin an hlawhtling a, chutih laiin ‘Made in India’ title ScarFall 2.0 ang chite chuan tual chhung mipui pual bika siam production value tha zawk an rawn lantir tan a ni.
MIXI Global Investments report chipchiar zawka an zir chiannaah chuan India-a developer ecosystem zau zel pawh a huam tel a, tunah hian company 2,000 aia tam awmin professional 1,30,000 aia tam an chhawr mek a. Chumi rual chuan category dang microdramas ang chite pawh a tel a, hemi kawngah phei hian India chu download volume lamah khawvel pumah market lian ber a lo ni ta a ni.