Aizawl: DC Conference Hall, Mamit-ah union rural development ministry hotute nen July 1, 2026 atanga kalpui, VB GRAM G Act chu Mamit district-a kalpui dan leh inbuatsaihna thlirho a ni a, Suvigya S Chandra, District Bawrhsapin a kaihruai.
Lalchhanhima, Project Director, DRDO chuan Mamit district chhunga block pali hnuaia hmalak tawhnate sawi zauvin hmalak ngai leh harsatna an tawhte hotute hnenah thlenin mipuite nena thawhhona tha an neih theih zel nan an harsatnate sutkianpui turin a sawm.
Ministry atangin Ajay Kumar, Director; Prince Tomar, Under Secretary leh Ankul Goyal, Section Officer te chu VB GRAM G Act inbuatsaihna enin Reiek block-a hmalakna en tum a ni a, state-in puih an ngaihna laite enfiah turin an kal a ni.
Kumar-a chuan VB GRAM G Act-in a tum tlangpuite sawiin sorkar laipui chuan India-a state zawng zawng tlawh chhuah nise tiin team din a ni a, Mizoramah Mamit district chu aspirational district a nihna anga ngai pawimawhin inbuatsaihna enpui tur leh harsatna an tawh sutkian an tum thu a sawi.
Bawrhsap chuan sorkar laipui atanga hotute a hmun ngeia hnawthawhna enpuia an lo kal thei chu lawmawm a tih thu a sawi a, he act hi mipuite tana hamthatna sorkar laipuiin a duan chu hlawk taka hman a ni theih nan line department-te nen theihtawp an chhuah tur thu a sawi bawk.