Zee Entertainment Enterprises chuan FIFA nena an thawh dun hnuah an football-a OTT subscription sum hmuh za zela 15 (15%) chu India-a football tihhmasawn leh chawi kan nan hman an tum a ni.
2026 FIFA World Cup khelh mek pawh telin FIFA thil hrang hrang lian tham tihchhuahna phalna tam tak an chan hnuah Zee chuan football federation-te nena thawk dunin thiamna bik zawn chhuah leh chher chhuahna kawngah te, league kalhmang tha zawk siamnaah te leh India rama player-te leh coach-te tana mamawh hrang hrang ruahmansakna kawngah an thawk dun dawn tih an sawi.
Zee chuan thuchhuah siamin, “Zee5-a football kaihhnawih subscription atanga sum hmuh za zela 15 chu India-a football chawi kan nan hman a ni dawn a. Company-in kum 2034 thlenga FIFA nena thawhdunna an neih hian infiamna thiamna pakhat a nih anga football tihhmasawn an tum ruhzia a lantir a ni,” tiin an sawi.
Ruahmanna fel tak hnuaiah Zee hian training pekna kawngah leh khawpui, district, state leh ram pum thlenga league hrang hrang hlawhtling tak siamna kawngah a pui dawn a ni.
Hmasawnna tura hmalaknate thlawp belh nan India-a boruak tha leh duhawm tak siampui turin Zee chuan football lama mi hriat hlawh leh mi thiam bikte a sawm khawm dawn a. Hei bakah khawvel huapa infiamna pawl liante leh ram chhunga national leh state level association hrang hrangte nen thawk hoin thiam bik zawn chhuahna leh training pekna kawnga hmalakna tak tak an duang chhuak dawn bawk a ni.
He thutlukna chungchanga a ngaihdan sawiin Zee Entertainment Enterprises Chief Executive Officer Punit Goenka chuan, “He hmalakna hmang hian kan football entute chu khawvel huapa he infiamna hmuhnawm tak khelh châk, Indian tam takte duhthusam tihpuitlinna kawnga tel ve turin kawng kan hawnsak a. Kan hmalakna hian tuina leh hun tha khaikhawmin, mipui phurna leh inhmanna chu thil hlawhtling takah chantir a tum a ni,” tiin a sawi.