Aizawl: Mizoram Pradesh Congress Committee (MPCC)-in Foreign Contribution Regulation (Amendment) Bill leh India rama Kristian tihduhdahna duh lohna lantir nan ‘black day’ hman an tum.
India hmun hrang hrangah Kristian tihduhdahna a hluar zel nia sawiin MPCC hruaitute chuan Thawhlehni hian Mizoram hmun hrang hrangah ‘black day’ hman an tum tih an sawi a. Mizorama kohhran hrang hrang, NGO hrang hrang leh political party hrang hrangte pawh thlawp tura ngenna ziaka an pek thu an sawi.
MPCC chuan FCRA bill leh Kristian tihduhdahna do tura an hmalaknaah Mizoram mipuite tawiawm turin an ngen a. “Tawngtaina nena hnatlang turin kan ngen tak meuh meuh a ni,” tiin, “Kan ram, kan hnam leh sakhaw tana pawi thei FCRA amendment kaltlangpui tumna hi Congress party chuan theihtawp chhuahin a do zel dawn a ni,” an ti bawk.