Aizawl: Tawipui South-a Thawhlehnituka lei min chu a nasat avang leh a chung lama lung tla mai thei a awm nual avangin then fai hna hi kalpui mai theih a la ni lo va, Lunglei DC thupek angin hnathawktute him zawk nan Nilaini atang khan lung lian tla mai theite chu tihkeh hmasak tuma hma lak a ni.
Lei min avang hian lirthei tangkhang awm nual a , khualzin tangkhang tam zawkte hi pumpelh atanga kea kalin inbanlektir an ni a, tun dinhmunah hriat theih chinah Tawipui South khaw chhungah hian mikhual 170 vel awm mek anga chhut niin kawng tlang hun tur hi sawi mai theih a nih loh avangin khualzin tangkhang mikhualte buaipuina tur hian Lunglei DC Office atangin Rs. 20,000 leh silpouline pali pek niin Lunglei South Bialtu Lalramliana pawhin tanpuina Rs. 10,000 leh silpouline pahnih Tawipui South YMA hnenah hian a hlan a, Lawngtlai Maxicab Owner Association pawhin Rs. 2,000 pe bawkin, hemi bakah hian mi tlawmngaite hnen atangin tanpuina hrang hrang dawn a ni bawk.