Aizawl: Aizawl DC Pisapui Hall-ah Nilaini khan Aizawl district tana Electoral Roll for SIR, 2026 observer tana Election Commission of India (ECI)-in a ruat, V. Lalsangliana, IAS, Commissioner & Secretary, PWD leh UD&PA hovin SIR, 2026 buaipuitu official te, tlawmngai pawl aiawhte leh political party aiawhte an thukhawm.
Er. Lalhriatpuia, IAS, DEO leh bawrhsap ni bawk chuan Aizawl District chhunga SIR, 2026 hmalak tawhna leh hmachhawp hrang hrangte report a pe.
V. Lalsangliana chuan thutkhawm koh chhan sawiin Aizawl district chhunga SIR, 2026 kalpui mekah ECI-in hmalakna dan tur phase hrang hrang a duan te, hunbi tiam chhungin tha takin an zo thei dawn em tih te, mipui hnenah awareness an pe tha tawk em tih te, DEO, ERO, EROs, BLO leh BLA-ten eng nge harsatna leh thurawn an neih tih te hriat a duh bakah NGO leh political party te feedback leh thurawnte ngaihthlak a duh bawk tih a sawi.
V. Lalsangliana chuan tunah hian claims & objection period-ah an awm mek a, electoral roll-a inthun thar theih tawh si, thun loh an awm palh em, electoral roll-a chuang tur ni lo chuang si an awm em, electoral roll-a inthun thar hun, siam that ngai siam that hun leh paih ngaite paih tura buaipui hun lai a ni a. SIR, 2026 hi Mizoramin electoral roll dik, thianghlim leh felfai an siam hun lai a nih avangin political party leh tlawmngai pawlte pawhin theihtawp chhuaha ERO, AERO, BLO, BLA te lo puibawm turin a ngen tih a sawi bawk.
Meeting-ah hian DEO, Dy. DEO, ERO, AERO, SP aiawh, political party aiawh leh tlawmngai pawl hrang hrang aiawh te an tel a ni.
DC Pisapuii Hall-ah meeting zawhah hian electoral roll observer chuan concerned ERO leh AERO te nen 13/11- Zuangtui, 13/10- Muanna Veng, 10/5- Durtlang leh 10/8- Durtlang ‘V’ polling station te an tlawh nghal a ni.