Aizawl: MPCC Farmer Department Chairman, Vanlalruata Chenkual chuan Congress party chu Pathian lam tang, Kristian-te leh hnam tlem zawkte humhalha thlamuantu a nih thu sawiin, Parliament-a BJP-in FCRA Amendment Bill 2026 put luh an tum chu dodal nan Congress chuan July 21, 2026 hian ‘Black Day’ an hmang dawn tih a sawi.
Thawhtannia Congress Bhavan-a MPCC Political Session-ah Vanlalruata Chenkual chuan kum 2028 Mizoram Assembly Election-ah ram economy siam tha tura Congress party an sorkar ngei a ngai tih a sawi a. |halaite tana hna siamsak te, environment chhe chak lutuk te siam thaa hnam intodelh siam tura an sorkar a pawimawh tih a sawi.
Congress party-in NLUP changtlung zawk an ruahman mek thu sawiin thar chhuah mumal tak nei turin sumchang thlai chinna zau siam leh all-weathered road, tui, kawlphetha leh market ngialnghet te buatsaih an tum thu a sawi. Zau khata hmalakna te chu Co-operative Society hnuaia inrelbawlin, processing unit thlengin siamsak an tum tih a sawi.
Vanlalruata chuan tunhma atanga Congress sorkar hmalakna hrang hrang — rangva inchung nei lo chhungkua 39,214 hnena rangva sem leh NLUP hmanga chhungkua 1,40,736 hnena cheng nuai khat theuh sem tawhte a sawi lang bawk.