Aizawl: Pathianni zan khan Lunglei district-a Mausen daia car chesualah Zomuansangi (45), Lalrotluanga Hnamte nupui, Govt. Mualthuam North High School-a Hindi zirtirtu a thi.
Car accident hi Lunglei atanga Mualthuam North pana tlan a ni a, an chesual tih hriat mai a ni lo va, Pathianni zan dar 8:45 vel khan an fanu chu kawngpuiah vak chhuakin an chetsual thu hi hriat chhuah chauh a ni.
Thu dawn danin Lalrotluanga Hnamte te chhungkua hi Lunglei-a a unaupa thihnaa kal an ni a, Thawhtannia sikul kal a ngaih avangin Pathianni zan khan an haw a, thihnaa kal an nih avangin an tlaivar chau chu motor khalhtu Lalrotluanga Hnamte hi a muthlu nia ngaih a ni. An chetsual hun hi chiang taka hriat ni lo mah se, zan dar 8 leh 8:30 inkar vel ni tura ngaih a ni.
Vanduaina a thleng tih hriat a nih ve leh Mausen bakah Haulawng leh Mualthuam North-a mi tlawmngaiten a hmun an pan nghal a. Buaipui ngaite an buaipui nghal a ni.
Zomuansangi tih loh a pasal leh an fate pahnih chu an hliam na lutuk lo nia hriat a ni.