Aizawl: Mizoram Govt. Adhoc Aided High School Teacher Association (MIGAHTA) chuan Mizoram puma adhoc high school-te dinhmun tha zawk (provincialise) a hlang kai tura sorkar an ngenna a puitlin tak loh bakah dinhmun hniam zawk, lumpsum grant-in-aid-a dah let tum an ni chu duh lohna lantir nan vawiin atang hian lungawi lohna an nei tan dawn.
MIGAHTA chuan an thil phut hrang hrangte sorkar atanga a hlawhtlinna an hmuh theih nan leh an lungawi lohna lantir nan hian Mizoram puma adhoc high school 80 chuangten mahni school theuhah July 21 & 22, 2026 chhung hian badge dum an bel dawn a ni.
He an lungawi lohna lantirna hmasa hian awmzia a nei lo a nih chuan July 23 & 24, 2026-ah No Teaching Day hmanga zirtirna hna thawh chawlh an tum a. July 27 & 28, 2026-ah sorkar atanga thu lawmawm an hmu lo zel a nih chuan mass casual leave lak an tum a, hei pawh hian awmzia a nei lo reng a nih chuan July 29 – 31, 2026-ah Aizawl khawpui chhungah peaceful sit-in demonstration neih an tum bawk.
MIGAHTA chuan heti chung pawha sorkarin an ngenna an ngaithla lo a nih chuan a aia na zawka hmalak zel an tum thu an sawi tel bawk.
Tuna an hmalakna tur avanga mipui leh sorkar hotuten harsatna an tawn turah hriatthiamna an ngen a. An thil phut hi thangthar sorkar hna zawng mekte tan pawh a pawimawh dawn avangin Mizo mipuite pawh hriatthiamna leh thlawpna pe turin an ngen bawk.