Aizawl: State Taxation Department Commissioner, HK Lalhawngliana chuan Goods & Services Tax (GST) hmasawnna chu ram chhung ei leh bar leh hmasawnna kawnga pawimawh tak a nih thu a sawi.
He thu hi Thawhtannia Press Information Bureau (PIB), Aizawl buatsaih media workshop — Vartalap — ‘12 Years of Governance on Employment Generation and Economic Reforms under GST’ tih thupui hmanga hmanpui naah a sawi a ni.
HK Lalhawngliana chuan Prime Minister Narendra Modi-a kaihhruai sorkar hnuaiah India chu kawng hrang hrangin hma a sawn tih sawiin, ei leh bar kawnga ram thanna chu India hmasawnna thlentu lian tak a nih thu a sawi.
GST punna chu data satliah mai ni lovin ram hmasawnna innghahna lungphum pawimawh tak a nih thu leh, hun hmasa lama ei leh bar zawnna kawnga harsatna tawk thin India ram chu tunah chuan midangte hna siamsaktu a lo ni tawh tih a sawi a. India-in ram hmasawn nih a tumna kawngah GST hi a pawimawh em avangin Mizoram pawhin hemi kawngah hian theihtawp a chhuah a tul thu a sawi bawk.
He hun hi Guest of Honour anga hmanpuitu, LR Sailo pawhin thu sawiin sorkar laipui hmalakna hnuaiah media a thang chak hle tih leh tunlai thiamna hmangin mipuiin thuthar awlsam takin an hre thei a ni tih a sawi a. Mizoram ngeiah pawh tual chhung thuthar thehdarhtuten hma an sawn avangin mipuiin thu dik leh rintlak an hriat phah nia sawiin, khawtlang siam that kawngah media-te dik taka hna thawk chhunzawm zel turin a chah.
Khualzahawm, Khadi & Village Industries Commission (KVIC) Asst. Director J. Zodinpuii pawhin sorkar laipui hmalakna hnuaia mipuite hamthatna hrang hrang tar langin, mipuite mamawh thlen turin sorkar a awm reng thu a sawi bawk.
Vartalap hmanah hian State Taxation Department leh KVIC atangin mi thiamten zirtirna hrang hrang an pe a ni.