Chief Minister Lalduhoma chuan Aizawl khawpui lailia Assam Rifles ram chu mipui kuta a lo awm tak avangin khawpui hmel thar, mawi, tha leh him si siam tura master plan duan a nih thu a sawi.
Thawhtanni khan I&PR Mini Theatre-ah chief minister chuan UD&PA department buatsaih, Aizawl khawpui hmel thar tura Vana Pa Hall & Park Architectural Design Competition lawmman dawngtute hnenah lawmman a hlan a. UD&PA Minister K. Sapdanga chu khualzahawm a ni.
Lalduhoma chuan Aizawl khawpui lailia Assam Rifle ram chu mipui kuta a lo awm tak avangin khawpui hmel thar, mawi, tha leh him si siam tura master plan duan a nih thu a sawi a. Advisory Committee ruahmanna angin Aizawl centre langsar ber tur sak nan Architectural Design Competition hi buatsaih a nih thu a sawi.
Chief minister chuan India-a architect thiam ber pawhin an design chu lawmawm a ti a. PM-DevINE hmanga sak tum a nih dawn avangin concept paper leh DPR-te chak taka umzui a nih tur thu a sawi bawk.
Khualzahawm, UD&PA minister pawhin sorkarin Aizawl hmel thar, changkang leh mipuiten an tlawh châk em em tur duang mekin a taka chantir thuai an tum thu a sawi.
He inelna hi March 17 atanga tan niin, firm 33 an tel a, an zingah hian state pawn lam firm pawh an awm a. Thehluh hun tura hun tiam, May 15 khan firm 16-in an design an thehlut a, an zinga 14 chu pawm a ni a. Endiktuten endikna chi hrang hrang an kalpui hnuah a titha zual firm paruk an thlang leh a, chung mite chuan an design chu endiktute hmaah an sawi fiah a, endikna kalpui nan hian thla thum chhung hun hman a ni.
PWD Chief Architect Lalengzuali chuan endiktute aiawhin endikna an kalpui dan tlangpui a sawi a. Ram changkang zawka vantlang hmunhma tha tak takte chu architectural design intihsiakna hmanga sak an ni fo thin a, Mizoram sorkarin chutiang rilru pu phaka intihsiakna a kalpui chu a changkangin a tunlai em em a, intihsiakna pawh Council of Architecture duh dan mila kalpui a nih thu a sawi.
Architectural Firm pathum hnenah consolation prize leh firm dang pahnih hnenah honorarium hlan an ni a, chungte chu:
Consolation Prize (Certificate of Appreciation) dawngtute chu:
- Studio Hamlet
- Forbattra Architects
- Tiberia
Honorarium dawngtute chu:
- Okahito Consultancy Services
- HTL Architecture & Landscape Design Studio