Tunlaiin traffic police te an tang a, zan lam leh office kal lohni, pathianni thlengin lirthei veivak endik hna an thawk thin. An thawhrimna a fakawm hle.
Lirthei khalhtute hi endik ngai an ni a, dan zawm lo leh dan phal loha khalh an tam hle thin a, hei hian chetsualna tam tak a thlen phah thin bawk.
Fimkhur lohna avang hian nunna tam tak lakin a lo awm tawh a, chuvang chuan mitin fimkhur a ngai a, mahni fimkhur viau mah ila fimkhur lo midangte avanga tawhsual tawk thei kan la ni lehzel bawk nen, a hlauhawm zawnga kan inzirtir hunte pawh hi a la thleng mai thei a ni.
Dan dik lova lirthei khalh leh kumtling lova lirthei khalh hi a hremna a sang a, hei hi kan hriat thar pawh a tul hle bawk.
Khawpui kawng a zim a, lirthei erawh a pung zel thung. Kawngpui zauh ngaihna a awm tawh bawk si lo, hetih lai hian ke hnih nei taxi khalh leh hmeichhia lirthei ke hnih nei khalh chhuakte hian a tlangpuiin harsatna leh hlauhawmna an thlen duh viau mai a, kumtling lo lirthei khalhte ang bawka en uluk ngai an ni.
Traffic police te hian theihtawp chhuah zel se la, sorkar pawh hian thuam chakin, a tul angin hnathawktu tur pek belh thei se, chetsualna tam tak laka kan him theih nan i fimkhur tlang zel ang u.