Aizawl: Chief Minister Lalduhoma hovin Thawhlehni khan a pisa-ah Department of Personnel & Administrative Reforms (DP&AR) hmalakna an thlir let.
Thutkhawmah hian Chief Minister chuan sorkar hna tluang taka a kal a, ram hmasawnna hmuh a duh thu sawiin, “Hetianga a mawhphurtute kan han thukhawm a, hmasawnna tur thil pawimawhte kan sawiho hi a tul a ni. Siam that ngai chu siam tha turin theihtawp kan chhuah tlang dawn nia,” a ti.
DP & AR Commissioner & Secretary Udit Prakash Rai chuan DP & AR hnuaia Wing hrang hrang leh MPSC hnathawh dante a sawifiah a. MPSC hian sorkar kum 2025-26 chhungin Exam vawi 142 kalpuiin result chi 57 an puang tawh a, DPC vawi 292 an thu tawh a ni.
Department hrang hrangin hna hniam lam thleng a MPSC hmanga lak an duh tawh avangin MPSC tihchak leh hnathawktu pek tam chu sorkar sum leh pai senso tihtlemna a nih thu a sawi bawk.
Joint Secretary H. Lalhmingthanga pawhin Good Governance and Training Wing (GGTW) leh Administrative Training Institute (ATI) hnathawhte a sawifiah a. ATI hian 2025-26 chhungin training vawi 84 neiin mi 2,389 an zirtir tawh a ni.
Meeting-ah hian ‘Right to Public Services Act’ online-a hman theih a nih tawh thu leh, chief minister-in a hawn ‘Mipui Aw’ kaltlanga lungawilohna thlen case 672 zinga 613 chinfel a nih tawh thu tar lan a ni bawk.
He review meeting-ah hian Adviser to CM TBC Lalvenchhunga, Chief Secretary Khilli Ram Meena, Commissioner & Secretary to CM Vanlaldina Fanai leh official pawimawhte an tel.