Free agency hmanga team dang a zawm dawn avanga Los Angeles Lakers a chhuahsan tur thu a puan hnua mipui hmaa a inlan vawi khatnaah LeBron James chuan a thutlukna a la puang lo.
James-a’n eng team nge a zawm dawn tih chu mi ngaihven berte zinga mi a ni mek a, amah ber hian engmah a la sawi chhuak lo thung.
Kar hnih liam ta vela a agent, Klutch Sports CEO ni bawk, Rich Paul-a’n Lakers hnenah James chu a chhuah dawn thu a hrilh hnu atang khan kum 41 mi hi team leh player tam takin season thara an hnena lut turin an dawr nasa hle.
“Thla khat vel liam taah khan LA chhuahsan tura thutlukna a siam hma hauh khan LeBron hi text ka thawn a, Indiana-a lo kal a duh chuan thil ropui tak kan ti thei ang ka ti,” tiin Haliburton chuan a sawi chhuak.
“Nui leh tap lem pahnihin min rawn chhang a, chu zawng chu ka dawn a ni mai. Chuvang chuan khami hnu atang khan free agency-a sawm hi ka bansan ta a ni. Indiana-ah hian a thleng thei ang em ka hre lo,” a ti bawk.
James-a hi team eng emaw zat chuan lak luh an la tum hle a, chung zingah chuan Cleveland Cavaliers, Miami Heat, Philadelphia 76ers leh Golden State Warriors te pawh an tel.