Hockey India chuan Zirtawpniah khan FIH Women’s Hockey World Cup lo awm tura India aiawh tur mi 20 awmna squad an puang a, midfielder Salima Tete chu captain a ni ang a, Mizo nula pahnih, Lalremsiami leh Lalthantluangi te pawh an tel.
FIH Women’s Hockey World Cup hi Netherlands leh Belgium ten an thleng dawn a, August 15 atanga 30 inkarah khelh tura ruahman a ni.
Hockey Mizoram chuan an player pahnihte an chhuang tak zet tih an sawi a, “In inpekna leh thawhrimna hian in chhungkua chauh ni lovin, kan state leh ram pum a chawimawi a ni,” an ti.
“Kan player-te hi tumna nei India aiawhin tha takin khel se, an hnungah India leh Mizoram chu a ding tlat a ni,” an ti bawk.
Bengaluru-a national camp-a inbuatsaih mek team chungchang sawiin coach Sjoerd Marijne chuan, “Kumin nipuia chona lian tak kan hmachhawn tur atana inpeih sa, thiamna inrualkhai player rual kan thlang a ni. Tournament hmachhawn tur hian team te theih tawp chhuahin an inbuatsaih a, he team theihnaah hi kan ring tawk hle. Khawvela team tha ber berte nena inel leh khelmual lian bera kan theihna pho chhuah chu kan nghakhlel hle a ni,” a ti.
Thla hmasa khan India hian New Zealand-a neih FIH Nations Cup-ah tlawm nei miah lovin no mawi an lo la tawh bawk a ni.
World Cup-ah hian India hi Pool D-ah awmtir an ni a, China, England leh South Africa te nen an awm ho dawn a. Pool stage inkhel zawng zawng hi Wagener Hockey Stadium, Amstelveen, Netherlands-ah an khel dawn a, August 16-ah China an hmachhawn hmasa ber ang a, August 18-ah South Africa an tum ang a, August 20-ah England an hmachhawn leh bawk ang.
- FIH Hockey Women’s World Cup 2026 neih tura India aiawha feh chhuak turte chu:
Goalkeeper: Savita, Bichu Devi Kharibam
Defender: Lalthantluangi, Ishika Chaudhary, Sushila Chanu Pukhrambam, Jyoti, Shilpi Dabas
Midfielder: Nikki Pradhan, Sakshi Rana, Sunelita Toppo, Salima Tete (c), Neha, Deepika Soreng
Forward: Lalremsiami, Rutuja Dadaso Pisal, Navneet Kaur, Deepika, Ishika, Baljeet Kaur, Beauty Dungdung