Aizawl: New Delhi-a zirlaiten lungawi lohna an lantirnaa MP leh Leader of Opposition Rahul Gandhi kutthlaka man a nih duh lohna leh zirlaite thlawpna lantirin Thawhlehni zan dar 9 khan Mizoram Pradesh Congress Committee (MPCC) hruaitute leh an member-te chu Lok Bhavan luhna bulah an pungkhawm.
He hunah hian MPCC Sr. Vice President Lalnunmawia Chuaungo chuan thu sawiin India pumah AICC President Mallikarjun Kharge leh Gandhi-a ten zirlaite thlavang an hauhna thlawpin state hrang hrangah Lok Bhavan kawtah punkhawm a nih thu a sawi a. MPCC President Lal Thanzara hmingin Mizoram larsap kaltlangin Prime Minister Narendra Modi hnenah memorandum an theh lut nghal bawk.
Memorandum-ah hian MPCC chuan zirlaite dikna leh chanvo humhim tura Lok Sabha Leader of Opposition, Gandhi-a hmalakna an thlawp tlat thu an tar lang a. Hemi rual hian Prime Minister Modi-a leh a kaihhruai sorkar laipuiin hemi kawnga hma an laknaah an hlawhchham chu an dem takzet thu an tar lang.
An lehkha theh luhah hian zirlai dikna chanvo humhimsak zo lo central sorkar demna leh, hemi a mawhphurhna laa Union Education Minister Dharmendra Pradhan-a bâng nghal tura phutna te, NEET leh exam dang buaina parliament-a sawi ho a nih ngei nan leh Delhi Police-ten zirlaite laka FIR an thehluh te hnuk kir leh tura phutna te a tel a ni.
MPCC chuan central sorkarin hma a lak zui loh chuan zirlaite leh thalaite tan hma an la zui zel dawn tih an tar lang bawk.
He punkhawmna hi MPCC Treasurer Dr. Lalmalsawma Nghaka’n a kaihruai a, MPCC Vice President John Rotluangliana leh AICC Incharge-Mizoram Mathew Antony te pawhin thu an sawi bawk.