Aizawl: Chief Minister Lalduhoma’n Eighth Schedule huanga Mizo tawng telh a nih theih nan hma an la mek tih a sawi.
Prof. Laltluangliana Khiangte chanchin mithiam hrang hrangte ziak dahkhawmna lehkhabu ‘Zawhzawzo Val’ (Festschrift – An damlaia mi thiamte chawimawina lehkhabu) leh Prof. Laltluangliana Khiangte ziak lehkhabu dang pahnih – Lalzika leh Vanthangi, sap tawnga ziak leh Teaching of Mizo Language in Secondary School, Dr. Lalramliana nena sap tawnga an ziakte (co-author) chu Nilaini khan chief minister-in a tlangzarh.
Khatla BSI Hall-a tlangzarh inkhawmah chief minister chuan sorkar laipuiah a bua an siam Eight Schedule a khung theihna tur tha tak an thehlut tih a sawi a, Eight Schedule huanga Mizo tawng dah luh chu tribal nihna a bona tur a ni lo tih a sawi.
Lalduhoma chuan khawvel hriata Mizo tawng a darh theih nan internet-ah a tam thei ang ber dah luh a pawimawh tih a sawi a. Mizo tawng hmangtu mi nuai 20 vel an awm tawh tih sawiin, tunlaiah Mizo tawng chu tawng thang chak tak a nih thu a sawi a, tunlaiah application awm tawh mah se lehkhabu tluk chu a la awm lo niin a sawi bawk.
Chief minister chuan Mizo Literature te, Pasaltha Khuangchera leh Lalzika & Vanthangi drama-te hnam dang tawng (English, Hindi, Bengali) leh internet-a vawrh darh a ni hian Mizo tawng leh hnam a pho chhuah bakah Mizo tawng humhalhna a nih thu a sawi a. Mizo tawng thumalte internet leh Artificial Intelligence (AI) platform hrang hrang, Google Translate e thlenga dah luh tam a pawimawh thu a sawi bawk.
MZU Vice Chancellor Prof. Dibakar Chandra Deka leh Prof. Laltluangliana Khiangte te pawhin thu an sawi.
Zawhzawzo Val-a a lan danin, Prof Laltluangliana Khiangte hian Play a ziak 40 zinga 20 hi Hindi tawnga lehlin a ni tawh a, 10 hi sap tawnga lehlin a ni a. A play ziah 20 vel leh a thu (prose) ziah 20 vel bakah a hla chhammi (poets) 10 hi India rama University hrang hrang panga velin an zirlaibuah an khung lut tawh a, tawng hrang hrangin an letling hlawm bawk.