Aizawl: Mizoram chhunga Anganwadi Centre (AWC) 300-te infrastructure leh service delivery tihchak nan Social Welfare, Women & Child Development (SWW&CD) Department leh SELCO Foundation-ten Ningani khan Memorandum of Understanding (MoU) an ziak.
He MoU hi SWW&CD Commissioner & Secretary Lalzarmawii leh SELCO Foundation Senior Project Manager Lalnuntluanga te’n ziak felin, Social Welfare Minister Lalrinpuii chuan khuallian niin a hmanpui.
Minister Lalrinpuii chuan Mizoram sorkarin naupangte thanlenna tur hmun him leh tha siamsak a ngaihpawimawh thu sawiin, SELCO Foundation nena thawhhona hian sustainable energy hmangin AWC-te a tichak dawn a ni, a ti.
Minister chuan he hmalakna hian khawtlanga hmeichhia leh naupangte hriselna, nutrition leh zirna a tihchangtlun a beisei thu sawiin, official-te chu field visit nei tam a, inelna thianghlim nei turin a chah bawk.
SELCO Foundation Project Manager Laltanpuia sawi danin, Decentralised Renewable Energy (DRE) solution hmanga solarisation hi December 2026-ah zawh tum a ni a. Kum hnih chhung kalpui tur he project hian hmun hla zawka Anganwadi Centre-te thlengin a huam dawn a ni.
He project hnuaiah hian local capability tihchak nan Anganwadi Worker, Helper leh official-te hnenah solar system enkawl dan training pek an ni anga, Saksham Anganwadi Centre 10 chu demonstration model atan tihchangtlun an ni bawk ang.
Kum hnih chhung kalpui tur, he thawhhona hian khawtlang leh vengchhung a hmeichhia leh naupangte tan early childhood development, nutrition leh health service-te tihchangtlun a tum a. Hmun hla leh service pekna remchang tawk lo hmunte pawh huamin, community-te mamawh phuhru thin heng centre-te hi an kaihhruaina tihchak tum a ni bawk.