Aizawl: Aizawl Municipal Corporation (AMC) leh Lunglei Municipal Corporation (LMC) hnuaia Local Council pakua leh District pathuma Village Council pathuma seat ruak hnawh khat turin August ni 20-ah bye-election neih a ni dawn.
State Election Commission in inthlan that a puanna hmun te hi AMC huam chhunga Local Council pariat – Selesih, Durtlang, Zotlang, Luangmual, Dawrpui Vengthar, Bungkawn, Republic leh Salem Veng te an ni a. Heng zingah hian ruat bik seat Republic leh Luangmual ah te awmin a bak zawng vengah hian a nawlpuiin an chuh theih seat khat theuh a ruak a ni.
District pathum huam chhunga Village Council pathum te hi Lunglei district-a Bunghmun, Serchhip District a East Lungdar leh Kolasib district a Bilkhawthlir South te an ni a. Heng zingah hian ruat bik seat Bunghmunah awmin, East Lungdar leh Bilkhawthlir South-ah hian a nawlpuiin an chuh theih seat khat ve ve a ruak a ni.
LMC huam chhunga Local Council pakhat Zotlangah pawh a nawlpuin an chuh theih seat ruak pakhat a awm bawk.
Heng bye-election neihna tur Local Council leh Village Council-ah te hian Model Code of Conduct hman tan nghal a ni.
He inthlana chuh tum te tan August ni 3 thleng khian nomination file theih a ni ang a, August ni 20-ah vote thlak a ni ang a, vote thlak hun khar a nih hnuah vote tlate chhiar nghal a ni dawn bawk.