Chief Minister Lalduhoma’n Thawhtannia ZMC&H, Falkawn a tlawhnaah sorkar laipui scheme thar, Financial Assistance to states/UTs for Public Health Infrastructure (FASPHI) atangin kum 2026-27 chhungin Mizoramin Rs vbc 120 a hmu dawn tih a sawi.
Chief minister sawi danin he scheme-ah hian indicators hrang hrang — Infant Mortality Rate (IMR) leh National Quality Assurance Standards (NQAS) certified damdawi in tam dan hmanga chhutin lawmman (incentive) hi sem a ni a. Mizoram phei chu IMR a tlakhniam avangin Rs vbc 20 leh NQAS certified damdawi in zaa 21.07 zeta a pun avangin lawmman sang ber pawl Rs vbc 100 incentive dawn a ni a. Ministry of Health & Family Welfare (MoHFW) chuan project proposal-te hi pawmsakin Ministry of Finance-ah a thehlut zui dawn a ni.
He scheme hmanga project thawh tur approve tawhte zingah hian Sakawrdai, Kawrthah, West Phaileng leh Bungtlang South CHC-te FRU-CHC-a upgradation thawh te, Lunglei leh Lawngtlai District Hospital-a Infectious Diseases Ward siam te, Kulikawn Sub-District Hospital-a Infectious Diseases Ward leh TB Treatment Unit siam te, leh health facility hrang hrang tana hmanrua (equipment) lei te a tel a ni.
Chief Minister chuan hmalakna tha avanga lawmman hmuh thin chu a chhuanawm hle tiin Health Minister leh a thawktute chungah lawmthu a sawi.
Chief Minister hian ZMC&H hmunhmate a fang nghal a, an mamawh hrang hrangte a hmunah a enpui bawk.
ZMC&H-ah hian tunah zirlai 494 leh intern ti mek 97 an awm a, PG seat 10 leh Master of Public Health te pawh hawn a ni tawh a ni. Department pariatin NQAS National Certificate an hmu tawh a, kum hnih leh a chanve chhungin cabin thar 30 leh ICU khum thar 13 siam belh a ni tawh bawk.
He hunah hian Health Minister Lalrinpuii leh Adviser to CM TBC Lalvenchhunga ten an tawiawm a ni.