Aizawl: Mizoram Agricultural Marketing Board (MAMB) chuan Market Intervention Scheme (MIS) 2024-2025 hnuaia sawhthing atana central sorkar atanga pawisa an dawn, Rs 9,48,14,281 chu state sorkar hnenah a hlan.
Thawhlehni khan MAMB chu an Chairman, Agriculture & Farmers’ Welfare Minister ni bawk PC Vanlalruata kaihhruaina hnuaiah MAMB Committee Room-ah an thukhawm a. Minister chuan MAMB aiawhin central scheme MIS hnuaia pawisa an dawn hi state sorkar hnenah a hlan a. State sorkar aiawhin Finance Department Secretary Ramchuana’n a dawng a, he pawisa hi state sorkar account-ah deposit a ni ang.
MIS 2024-2025 hnuaiah hian MAMB chuan sorkar laipui Ministry of Agriculture & Farmers’ Welfare atangin he sum hi a dawng a ni.
MIS scheme hnuaiah hian sorkarin kuthnathawktute atanga sawhthing a leinaa hloh (net loss) a neih zat atanga zaa 75 chu central sorkarin a tum tur a ni a. Chutiang atan chuan central sorkar chuan Rs 9,48,14,281 hi tum vein, MAMB hian state sorkarah a chhung lut leh a ni.