Aizawl: Central Anti Drugs Squad (CADS) 3rd Batch, 2026 member tharte lawm luhna hun neih a ni a, CADS 2nd Batch leh Zone Anti Drugs Squad (ZADS) te ruihhlo man hrang hrang tihralna hun hman zui nghal a ni bawk.
Thawhlehni tlai dar 3-a Central YMA Hall, Tuikhuahtlangah member thar lawm luh inkhawm hi Central YMA Treasurer Er. H. Duhkima’n kaihruaiin, Central YMA Vice President Prof. Lalnuntluanga chuan CADS member tharte fuihna thu sawiin, Central YMA Finance Secretary MS Ralte (CADS 3rd Batch Convener) in thu a sawi a. Hemi hnu hian ruihhlo tihralna hun hi neih nghal a ni.
CADS 2nd Batch hun chhung (April 22 atanga July 28, 2026)-a CADS leh ZADS (Zone I – X) hrang hrangte ruihhlo man tihral takte chu Heroin No. 4 hawng 432, TicTac 1,870 leh Chhinsen 998 (an rih zawng gram 5,935.22 /5.935 Kg), Methamphetamine (Meth) tablet 90,061, Ganja kg. 21.894, Cough Syrup bur 5,245 leh damdawi ruihchi AP leh Pregabalin etc. tablet 19,066, box khat leh strip ruk te an ni.
Hemi bakah hian CADS 2nd Batch term chhung hian mi 19 te chu Home leh Rehabilitation Center-ah dah niin, mi 53 te chu Excise & Narcotics Department-ah hlan an ni a, mi 386 te hnenah Counselling neihpui an ni bawk.