Aizawl: Mizoram Disaster Management & Rehabilitation (DM&R) Minister Prof. Lalnilawma leh Ministry of Home Affairs (MHA) hotute chuan Thawhlehni khan New Delhi-ah Mizorama khuarel chhiatna hrang hrang laka invenna leh hmalakna (Disaster Mitigation Initiatives) an thlir ho.
Thutkhawmah hian Mizoram tana Disaster Mitigation Project sorkar laipuiin a pawmpui tawhte a rang thei ang bera hma lak nghal dan tur leh Project kalpuitu Institution-te thuam chak dan turte rel a ni a. Mipui vantlang chhiatna laka inveng tura zirtirna leh hmalakna atan sorkarin Rs vbc 10 a dah hran tawh thu tarlan a ni bawk.
Leilung pianhmang mumal zawka thliarfelna (Digital Elevation Model) leh ram hmelhmang zirchianna (slope investigation) puitlin tura Geological Survey of India (GSI) leh Mizoram PWD-te thawhho zel rel a ni a. Kangmei, lirnghing leh chhiatna dang laka invenna hmalakna hrang hrang pawh thlirho a ni.
Seismic Zone V-a awm leh leimin laka khawpui inbeng muk lutuk ven nan minister-in ‘Peace City’ din hmathlir a pharh chu MHA hotute pawhin a tha hle a an hriat thu an sawi.
Hei bakah hian kumin chawhnu lama Mizorama North-East Disaster Management Ministers’ Conclave buatsaih tura rawtna lut pawh thlirho nghal a ni a. MHA chuan Mizoram chu Disaster Resilience Agenda 10 tihhlawhtlin kawnga hmarchhak state dangte tihhmuhtu ni tura a duhsak thu leh State Disaster Management Authority (SDMA) leh District Disaster Management Authority (DDMA)-te thuam chak kawngah an thlawp thu an sawi bawk.
Minister hi DM&R Secretary Sushil Singh bakah New Delhi Mizoram House Addl Resident Commissioner Alexander V Chongthu ten an tawiawm a ni.