FIFA World Cup-a tum nga champion tawh, Brazil chuan October 3 hian Kolkata-a Vivekananda Yuva Bharati Krirangan (VYBK)-ah India (Blue Tigers) an hmachhawn dawn a. India team hmachhawn tur hian an player tha ber berte an hruai dawn.
Brazilian Football Confederation (CBF) leh All India Football Federation (AIFF) inbiakna leh inremna hnuaiah Brazil-in India an tlawh chhung hian an ‘A’ team an khelhtir a ngai a. Hemi awmzia chu India football fan-ten khawvela football star langsar ber berte chu Kolkata-a an inkhel lai an hmu thei dawn a ni.
Ningani khan AIFF leh CBF chuan inkhel tur hi an nemnghet a, India-a ram hrang hrang football khel buatsaih tawh zawng zawnga la ropui ber pakhat a nih rin a ni a. India nena an inkhel tur hi September leh October thlaa ram leh ram inkhelh hun hawn chhunga Brazil-in Asia an fan turah an telh a ni.
Brazil team (Selecao) hian Australia an pan hmasa phawt ang a, chutah chuan September 25 leh September 29 ah friendly match tum hnih an khel ang a, chumi hnuah October 3-a India hmachhawn tur hian Kolkata an pan ang.
Inkhel buatsaihtute hian Brazil koh luhna atan hian Rs. vaibelchhe 60-70 vel an hmang dawn niin an sawi a. Inremnaah hian Australia-a kal senior squad bawk India nena an inkhelhah an khel ang tih an nemnghet bawk.
India football tan khawvela national team hlawhtling leh ropui ber ber zinga pakhat hmachhawnna hun tha tak a ni dawn a, thil thleng khât tak a ni.
September-October ram leh ram inkhelh hun chhung hian India team hun pawh a tawt hle dawn a. Blue Tigers hi September 21 atanga October 6 thlenga neih tur, a hmasa ber ni bawk, FIFA ASEAN Cup 2026-ah an tel a ngai a. Brazil hmachhawn tur hian player tha ber berte chu an rem a rinawm a ni.