Aizawl: Tun hnaia Tlabung Sub-Division huam chhung Lamthai khuaa voter ID lem man chhuah a nih chungchangah, YMA Sub-Hqrs. Lunglei leh YMA Tlabung Branch-te chuan a mawhphurtu tak man a nih theih nan a tawp thlenga hmalak an tum.
YMA Sub-Hqrs. Lunglei leh YMA Tlabung Branch-te chuan Zirtawpni kaltaa Lamthai khua an tlawhnaah he khuaa voter ID paruk chu a lem, siam chawp a ni tih an finfiah a, heng ID lem siamtirtute hian ID pakhat siam nan Rs 6,000 zel an chawi thu an inpuang a ni.
He khuaa khawtlang hruaitu pakhat chuan voter roll-a chuang lo mi parukte hi voter ID lem an neih theih nan a buaipui tih YMA hruaitute chuan sawiin, Aizawl veng pakhata voter ID lem siamsak thei nia insawi Mizo pakhat chu he khuaa Village Council member pakhat nupui nau kaltlangin an be pawp niin an sawi.
YMA hruaitute chuan voter ID lem leh a tak hi a EPIC number a inan chiah thu leh, a lem man chhuah paruk zinga pakhat neitu phei chu ramdangmi a nih avangin Bangladesh lamah a let leh tawh thu an sawi bawk.
India khua leh tui nihna finfiahna atana pawm lehkha pawimawh lem siam ngam chuan lehkha pawimawh dang pawh a siam ngam dawna an ngaih thu YMA hruaitute chuan sawiin, he dan bawhchhiatnaa a bul tumtu man a nih theih nan a tawp thlenga hmalak an tum thu an sawi a ni.