Aizawl: MNF-in nimina an party pisa, Hnam Runa chhungah National Core Committee (NCC) member Tawnluia chuan thu sawiin, chawlhkar kalta a chief minister-in Mizoram Law College-a remna thuthlung chungchanga a thusawi chu pawi a tih thu leh thu dik lo a nih avanga an lak thutak thu a sawi.
Deputy chief minister hlui ni bawk Tawnluia chuan remna thuthlung (Mizo Accord) hi India sorkar aiawh Home Secretary R.D. Pradhan leh Mizoram UT Chief Secretary Lalkhuma ten hming an ziak a, India Constitution Article 371(G)-a seng luh vek a nih avangin MNF leh India sorkar inremna satliah anga tar lang a, mipuite siam remna thuthlung tibawrhbang zawnga Chief Minister-in a sawi chu pawi an tih thu sawiin, MNF party hruaitute pawhin hemi chungchang hi vawiin hian meeting neia bawhzui an tum thu a sawi.
Inner Line Permit (ILP) chungchang sawi chhunzawmin, remna thuthlunga a ziah angin thlahdul an phal ngai dawn loh thu leh state sorkar berin a phal loh chuan thlahdul ngawt theih a nih loh thu Tawnluia chuan a sawi a. Forest Conservation Amendment Act (FCAA) chungchanga Chief Minister bihruk tum nia a hriat thu leh MNF sorkar a lo awm leh a nih chuan an thiat leh ngei dawn thu a sawi bakah, FCRA Bill chungchangah Kristian sakhua sawinghinga a awm mek laia sorkar hmalakna hmuh tur awm lo chu pawi a tih thu a sawi.
Mizoramin tun huna a mamawh ber chu rinawmna leh dikna a ni tiin, ram leh hnam dinchhuahna atan MNF chuan politics an khelh zel dawn thu a sawi bawk.