Ram kang nasa tak avangin US-a Washington hmun thenkhata cheng mi 60,000 vel insasengin in tam tak a chhia a, mi sang telin power an neih loh phah bawk.
Thawhtanni khan Spokane khawpui chhehvelah ram kang lian tak tak pathum a la awm a, thuneitute chuan thunun mai theih a la ni dawn lo tih an sawi.
Spokane Mayor Lisa Brown-i chuan an dinhmun chu ‘kan vela khuarel chhiatna nasa ber’ tiin a sawi a, thuneituten thil chhiate an thlithlai mek a, ‘nunna chân an awm thei em tih pawh an en mek’ tih a sawi bawk.
Thi leh hliam an awm tih erawh chiang taka hriat a la awm lo.
Spokane-a ram kang mek hi Thawhtanni tuk thlenga Washington state-a hmun 16 kang zinga pathum, la thunun loh zinga mi a ni tih an state natural resources department chuan a sawi.
National Weather Service (NWS) chuan kartawpah khan thli chak tak leh khaw ro tak a awm dawn avangin ‘hun khirh tak,’ ram kang darh zual duhna tak a ni dawn tih an lo sawi lawk tawh.
Scientist-te chuan mihringin a siam sik leh sa inthlakin khaw lum leh ro siamin kangmei chhuah a tiawlsam a; khaw lum uchuak tak tak a thlen phah a, nipui khawkheng a awm phah thei tih an sawi.
State chhunga mihring chen tam ber pahnihna, Spokane atanga video darhah chuan nasa taka kang leh khu chhah tak takte chu in bul lawkah hmuh theih a ni a, a chungah thelh tumin helicopter-te an thlawk bawk.
Chenna leh sumdawnna hmun telin in 600 vel a chhe tawh a. Avista Utilities chuan chhungkaw 10,000 chuangin electricity an nei lo mek bawk tih a tar lang.
Washington State Governor Bob Ferguson-a chuan state pumah emergency a puang a, Pathiannia thuthar lakhawmtute a kawmnaah US President Donald Trump-a biain sorkar laipui atanga puihna a dil tih a sawi.
Mayor Brown-i chuan, “A pawimawh ber chu mipuite hi inthiar chhuak tura an inrin leh dawhthei taka an awm a ngai a ni,” tiin BBC a hrilh.
Thawhtanni khan thli thaw a ziaawm hret a, hei hian a inmankai zel tur tichak lo hret a; mahse, kartawpah hian a chak thar leh rin a ni.