MPYCC chuan nimin khan mizoram chief minister Pu Lalduhawma’n tunhnaia Law College a a thusawiah hnamdang laka kan inhumhimna dan dinglai sawichhuak a, dan him lo a ni a, Vaiho hian kan va tih lutuk chuan min rawn thiahsak mai ang tih a hlauhawm a. Chuvangin ngawih mai mai a tha a ni, tia a sawi chu an duh lo hle a. Dawihzep, mahni ram leh hnam chhan nana engmah ti ngam lo tiin Vanapa hall kawtah CM thlalak an target a, pawnfen an fen tir a ni.
Hmanlai Sakei huai chanchin an ziakah khan khawthlang lam Tut luiah an val upa pakhat hovin nghafuan veng an riak a. An zinga mi Bawkkuia chu an riahbuk bul lawkah sakeiin a rawn seh ta mai a. A mangang au chuan min chhan rawh u a ti lawm lawm a. Tlangval pakhat chuan khawnge keiman ka’n sat ang e a tih chuan an val upa chuan lo khapin, in chhaih kawlh reu reu ang e a ti a. Bawkkuia chuan thei leh thei lovin a rawn au leh a. Mahse, a hnu lawkah lui lamah sakei chuan a hnuk liam thla ta a ni, an ti.
An ramvak hawin Bawkkuia thih dan an sawi chuan mi rilru a tina lutuk a, pasaltha Zingkela phei chuan, miin min chhan rawh u ti lawm lawm a, tiin awmhmunah a hmarcha rawtna a rawt keh sawk sawkin a inhrosa an ti.
An val upa chu lalnu thinrim chuan pawnfen feng rawh tiin a pawnfen in a vawm a, Val upa pawh chuan an khua chu nuam a ti ta ti lova, reiloteah a pem bo ta daih tihte kha a awm.
Pawnfen infentir hi mipa dawihzep ber laka kan intehkhinna thin kha a ni a. Naupan lai pawhin a dawih deuh kha pawnfen feng rawh kan ti thin kha ania. Kan Mizo society-ah chuan mipa tan a na hle a ni. Engpawhnise, MPYCC hian kan CM thusawi an duh loh entirna hi a mawi lo em em e kan ti a nih pawhin hun lokal leh turah mahni ram leh hnam tan hruaitu chu a huaisen hle tur a ni tih hi mipuiin kan beisei dan a nih hmel e. Kan dan a lo him tawk lo a nih pawha theihtawpa tang tura mipuiin kan beisei chu ram hruaitute an ni tih pawh inhriatthar thar nan hmang teh se.