India-a thalai rual telna, Cockroach Janta Party (CJP) chuan tun hnaia exam zawhna put vanga thil thleng zen zen lo thlentira minister hial bânna an nawr chhuah hnuah politic-a luh an tum lo tih a dintuin a sawi.
Thawhlehni khan Reuters-in Maharashtra-a an ina an kawmnaah Abhijeet Dipke-a chuan, “Gen Z-ten an duh lam bitum zel kan duh,” a ti a, Nilaini leh Ningani hian anmahni thlawptute nen an kal zel dan tur an sawiho mek.
Inthlan chuha politic-a zuan luh chu an tum lo tih a sawi a, chutih rual chuan ‘an mite zinga a tam zawkin’ an duh chuan an din ang a, a hnuah mipui duh dan ang zelin inthlan pawh an chuh ve ang tih a sawi.
“India-ah hian tun dinhmunah chuan political party din hi thil chin felna niin ka hre lo,” tiin Dipke-a chuan a sawi a. “India-in a mamawh chu thil hrang hrang rinngamna leh felfai taka kalpuina a awm leh theihna tura mipui movement zawk a ni,” a ti.
Tun dinhmunah chuan CJP hian Indian thalaite hmakhua ngai chung zelin an kal dawn a, heng mi tam tak hian an ram politician, court leh chanchinbute an ring zo tawh lo niin a sawi.
“Heng thalaite hi rawn leh an mamawh tak hriat hi a pawimawh tak zet a ni,” tiin Delhi-a lungawi lohna an lantirnaa a kai, khawsikpui atanga dam tan mek, Dipke-a chuan a sawi.
Ni 36 chhung exam zawhna put duh lohna leh education minister bân phuta lungawi lohna an lantir hnuah Dipke-a hi an khua, Chhatrapati Sambhajinagar-ah haw a ni.
June thlaa a lehkha zirna, US atanga a haw hnuah Dipke-a hian medical exam zawhna put duh lohna lantir turin Delhi-ah thalai sang tel a ko khawm a ni.
Tear gas leh tianga vuak an tawrh hnuah Education Minister Dharmendra Pradhan-a chu July 25 khan bâng turin an nawr tlu a, an pungkhawm pawh an titawp zui a ni.
Dipke-a hian political party din chu a duh rih lo va, sorkarin an hruaitute chhuina remchang an siamsak theih phah dawn niin a ngai.
Prime Minister Narendra Modi-a sorkar laka lungawi lohna an lantir laiin eptuten an thlawpna lantir fo mah se eng political party mah thlawp bik a nei lo tih a sawi bawk.
Mi thiamte chuan kum thara inthlan awm turah Indian thalai thinrim rualten awmzia an neih hle an ring a, inthlang tur zingah hian mihring tamna ber, Uttar Pradesh pawh a tel a. Ei tur thar chhuak tak, Punjab leh Modi-a state, Gujarat pawh a tel.
Dipke-a hi social media-a vauna a dawn nual avangin an inah hian police tam takin an veng a, a ngaih pawimawh ber chu a nu leh pate himna a ni tih a sawi.
“Ka nu leh pa ka ngaihtuah a, chu chu ina ka haw chhan pawh a ni,” a ti a. “Sorkarin vengtu tha tak min pek avangin engmah a thlen loh ka beisei,” a ti bawk.