Sepang circuit thuneitu pakhat chuan Malaysia-a Formula 1 intlansiak an buatsaih leh dawn chuan kum tin £ maktaduai 50 aia tam an sen a ngai ang tiin a sawi.
Kum 2017 atang khan Sepang International Circuit-ah hian F1 intlansiak an la buatsaih leh lo va, kumin October hian an dah hranna chu a tawp tawh dawn a. Middle East-a buaina avangin intlansiakna buatsaih chu a him tawk lo nia hriat a nih hnuah heti lai hmunah hian Bahrain Grand Prix buatsaih tura inremna hmanhmawh taka siam a ni.
Bahrain-in a senso tur tam zawk an tum nia hriat a ni a, chuvang chuan a hming pawh hi Bahrain Grand Prix tih zui a ni dawn a, Bahraini national airline, Gulf Air-in a sponsor zui bawk a ni.
Malaysia erawh chuan tun tumah hian FIA grade one license nei track/circuit a hmantir thung a ni.
F1 calendar-a helai hmun a inzeh leh thut avang hian Malaysia hian nakin zelah kum tin intlansiak nan ruahmanna a siam zui ang em tih zawhna a awm a. Sepang hi kum 2027 calendar-a tel tura ngaih zingah a awm ve lo va, Middle East-a buaina a awm chhunzawm zel a nih chuan a tel thar ve leh thei thung.
Circuit Chief Executive Officer Azhan Shafriman Hanif chuan nakin zelah an kir leh ngei thei a ni tih a sawi a, intlansiak buatsaih nana senso tlawm thei ang bera chhut pawha £ maktaduai 55 pek tur sum a awm chuan tih a ni a. “Ka chhut dan chuan ringgit maktaduai 300 (£ maktaduai 55) aiin a tlawm lo vang,” tiin a sawi.
“Mahse, a hlawkna lo lut turte pawh kan thlir thiam a ngai a. Data ka hmuhte atang chuan intlansiakna buatsaihtu ram tam zawk hian an sum sen aia a let thum zet hlawkna an hmu chhuak ziah a. Sawi fiah ta ila, RM maktaduai 300 kan hmang a nih hlawkna lo lut thei hi RM tluklehdingawn 1 pawh a tling thei a ni,” a ti.
F1 calendar-a awm chungchangah, “Nakin zelah, tun tum atanga data kan hmuh turte hi kan hma hun tur kan bawhzui dan tur bul tanna a ni thei ang. Thil dang pawimawh em em chu F1 calendar-a hmun a awm leh awm loh hi a ni. Hmun a awm loh chuan kan inzep thei chuang lo vang,” a ti.