Chief Minister Lalduhoma chuan tun hnaia Assam state-in tui lian nasa tak a tuar chu Mizoram mipuiten an tawrhpui thu a sawi.
Nilaini khan Assam Royal Global University (RGU), Guwahati-a Student Induction Programme — Deeksharambh 2026 chu khuallian niin Lalduhoma hian a hmanpui a. Tun hnaia Assam-in tui lian an tawrh chungchang sawiin Mizoram mipuite aiawhin nunna chânte leh in leh lo chânte an lainat em em thu leh an chanchin an ngaihven reng thu a sawi.
Mizoram leh Assam chu inthenawm, inmamawh tawna hmasawnna kawngah tum thuhmun neiin an kal a, mihring pawh an inkalpawh tam leh boruak ralmuang siam zui zel a tul thu a sawi a, Assam chief minister nena an inkawmnaah pawh boruak tha siam dun chu tha an tih dun thu a sawi bawk.
Chief minister chuan zirlai kalkhawmte chu hlawhtling taka university kal chhuak vek tur leh Mizo zirlaite pawh Zo nun ze mawi chhawm nung tura chahin, thalaite chu ram leh hnam chakna hnar an nih thu leh hmathlir thui tak nei tura inbuatsaih a pawimawh thu a sawi.
RGU phei chu zirna in tha a nih bakah hnam inpumkhatna leh mihring inunauna zirtirna hmun a nih thu sawiin, lo tang zel tur leh India tana malsawmna ni zel turin duhsakna a hlan a ni.
Hemi hnu hian chief minister chuan university hmunhma tlawh kualin Mizoram atanga he university-a zir mek zirlaite nen an inkawm nghal.
Kum 2017-a din, Assam Royal Global University hian tunah hian academic programme 130 leh zirlai 9,000 chuang an nei mek a. Kumin Student Induction Programme hi ni 19 chhung awh tur niin, ram 28 atanga zirlai thar kalkhawmte university hriatchiantirna leh inpawhna tha an neih theih nan buatsaih a ni.