India-in Independence Day a lawm hnai a, a lawmna pui ber neihna tur, Delhi-a Red Fort leh a chhehvelah venhimna khauh taka kalpui tan niin vengtu 20,000 vel nen thuah tam takin Prime Minister Narendra Modi-a’n August 15-a thu a sawina hmun tur hi an veng tawh.
Venhim hna thawktu zingah hian Delhi Police, paramilitary force, commando leh NSG team bakah ralsai thiam leh a bika zirtirr ‘hit team’ pawh an tel a, CCTV camera 1,000 chuang, facial recognition & number plate detection system tam tak vuah a ni bawk tih news agency PTI chuan a tar lang.
NDRF pawh eng emaw palh awm theia che thei turin dah an ni a. Quick Reaction Team (QRT) pawh ral thlirna in sang telin hmun pawimawh bikah dah an ni.
DCP North Raja Banthia chuan Red Fort leh a chhahveleh hian Independence Day pualin camera 1,000 chuang bun a ni tih a sawi a. “Thil thleng hrang hrangte lo dawnga lo thlithlaitu tur mi thiam bikte awmna control room siam a ni a, eng emaw palh a awma rang taka che thei turin an awm dawn a ni,” a ti.
Police eng emaw zat chu an taksaa thlalakna vuahsak an awm a. Drone hmanga beihna awm thei laka veng turin anti-drone system chhawp a ni a, social media-a mi titi lo thlithlaitu tur dah an ni bawk a. “Kil tinah inbuatsaihna kalpui a ni a, thil inhrilh fiah leh training session kan zo tawh a, a takin kan che mek tawh a ni,” tiin Banthia chuan a sawi.
Venhim hna thawktute dah puah lamah hian firfiaka chetna thleng palh a awma chet lak dan turah Delhi Police leh NSG bakah central leh state agency hrang hrangte chuan a huhovin khawpuiah hian counter-terrorism exercise an nei bawk.
‘Sudarshan Shakti-V’ vawi ngana hi Zirtawpni chawhma dar 10:00 leh a tuk zing dar 4:00 inkar khan home ministry enpuina hnuaiah neih a ni tih Delhi Police chuan an sawi tih PTI chuan a tar lang.