Democratic Republic of Congo-a Ebola leng mek kai finfiah chu mi 4,000 an tling ta.
Tun tum hri leng hi Ebola leng tawha a kai an tam ber dawttu leh inkai darh chak ber tum a ni.
Mi thiamte chu May 15-a hri a leng tih puan a nih hma thleng eng emaw zatah a darh tan tawhah an ngai a, a kai zat hi sorkar chhinchhiah aia tam fe ni ngei turah an ngai.
African laili rama public health institute chuan an chhinchhiahna thar berah a kai mi 4,053 leh thihpui 1,850 an awm tawh tih an tar lang.
A kai hi province panga – Ituri, North Kivu, South Kivu, Haut-Uele leh Tshopo-ah hmuh an ni.
Thla hmasaa chanchinbu, Science-in a tar lan dan chuan Congo-ah hian January khan hri hi a darh tan tawh a, Ituri bikah phei chuan a hma pawh a ni thei tih an sawi a. Zirtute chuan January thla laihawl leh May 15 inkarah khan hri kai nia rinhlelh 500 chuang an nei a ni.
Hri kai hmuh chhuah chak lo, hnuhma chhui muang, hel vanga buaina, a invenna leh damdawi awm lo chuan duh angin thunun a tiharsa niin a tar lang.
Africa khawthlang lamah Ebola hi kum 2014-16 inkar khan lengin mi 28,000 chuangin an kai a, Guinea, Liberia leh Sierra Leone-ah thihpui an tam hle.