Aizawl: Mizoram Public Service Commission (MPSC) chuan Mizo Zirlai Pawl (MZP)-in One Time Registration (OTR) tihtawp leh document thehluh kim lohte offline-a thehluh chhawn leh chungchanga an rawtna leh ngenna an thlen chu thil remchang leh tih chi a nih loh thu an sawi.
MZP General Secretary lehkha a chhannaah MPSC Secretary chuan OTR chu hna diltute hamthatna leh awlsamna tura siam a nih avangin tihtawp a rem loh chhan hrang hrang a hrilhfiah a ni.
MPSC chuan OTR tihtawp a nih a, hnaruak zawrh a nih apianga document thehluh thar ziah ngai chi ruahmanna hman leh chu hna diltute hmakhua thlirin pumpelhtir hram zawk an duh thu a sawi a. Document OTR-a dahluh tawhte chu hna diltuten application dangah an fetch chhunzawm zel theih avangin awlsam tak leh data entry ti tlem em emtu a nih thu an sawi bawk.
UPSC hnuaia OTR vawi khat bak thlak danglam phal a nih loh laiin, MPSC-ah thung chuan qualification leh document thar a in-update thei reng a, candidate-te tihsual palh vengtu leh an document pawimawh 24/7 him taka humhim a nih zawk thu an hrilhfiah a ni.
MZP-in appointment pek fel tawhte chungchanga ngenna an siam chungchangah, MPSC chuan hna hmu tawhte appointment tibuai zawnga hmalak chu thil dik lo nasa tak a awm a nih chauh loh chuan Law Court pawhin a duh ngai loh avangin thil tih chi loh tak a ni tiin a chhang a. Kum 2025-2026 chhung khan hna dilna 50,000 chuang leh 2026-2027 chhunga 20,000 chuang MPSC-in a buaipui tar lan a ni a, OTR document upload kim lo emaw upload tlai mi 500 vel buaina chinfel tum avanga mi tam zawkte hamthatna leh awlsamna tihtawp thung si chu MPSC ke penna tur a nih loh thu leh a him loh zawk bawk avangin offline-a document thehluh phal sak leh chu a remchang lo hle tih an sawi.
Rawtna zawm a rem lohna chhan dang MPSC-in a tarlan zingah, document upload hun bithliah pelh hnua offline-a thehluhna hun siamsak chungchang hi Rajasthan PSC leh Lavanshu Sankhla te case-a Supreme Court Judgement 04.05.2026 phei chuan application thehluh ni a document tarlan te chauh a pawm thei a, hmun dang atanga document re-submission siam a thiang lo tiin a pawm thu a tar lang.
OTR tihtawp leh tu te emaw hamthatna tur bika hmalakna hian Danpui Article 14 leh Article 16 (Equality of opportunity in public employment) a palzut thei dawn bawk a ni.
OTR leh document upload tlai chungchangah hian Gauhati High Court, Aizawl Bench-ah mi thenkhat an zualko mek a, Court-a thu inchiah lai a nih avangin thuchhuah a siam hmaa hmalak dan tihdanglam ngawt chu a rem lo hle bawk.
India ram State PSC hrang hrang zingah OTR hmang lo an awm tawh loh hial thu leh OTR hi hloh a nih chuan candidate-te leh MPSC tan hlohna lian tak a nih dawn avangin, offline-a document thehluh thar siamsak hi tun dinhmunah sawi thu a cheng lohah an ngai tiin MPSC chuan an sawi bawk.