Aizawl: Mizoram Handloom & Handicrafts Development Corporation Ltd. (ZOHANDCO) hmalaknaa din, ‘MadebyMizo Kiosk’ chu Zirtawpni khan 102 Humayunpur, Safdarjung Enclave, New Delhi-ah Chief Minister Lalduhoma’n a hawng.
MadebyMizo Kiosk hi Mizo kutchhuak leh thil siam zawrhna a ni a. Sorkar laipui Ministry of MSME hnuaia scheme pakhat, ‘RAMP’ hmanga din a ni a. ZOHANDCO hi he scheme-ah hian State Nodal Agency (SNA) niin scheme hnuaia component pakhat, ‘Marketing Intervention’ bikah mawhphurhna a la a ni.
Marketing Intervention hnuaiah hian ZOHANDCO chuan MadebyMizo.com (e-commerce) platform a tlangzarh tawh a. e-commerce-a Mizote siam chhuah bungrua ziah luhte a taka zawrh a nih theih nan MadebyMizo Kiosk hi din a ni.
New Delhi bakah hian Bengaluru leh Kolkata-ah te pawh din turin hmalakna a kalpui mek a ni bawk.
Kiosk atang hian bungrua a taka hralh thin a ni dawn a. e-commerce atanga online order awmte pawh Aizawl atanga thawn vek lovin kiosk atang hian an pe chhuak thei dawn a ni.
MadebyMizo Kiosk hi 750 sq. ft.-a lian a ni a, a din nan Rs nuai 71.41 sen a ni.
Hawn hnu hian Kidang Restaurant, Safdarjung Enclave-ah ‘Chief Minister’s Grand Dinner’ chhunzawm a ni a. Chief minister chuan, “Mizorama PSU-te chu sorkar tan phurh rit ni thin an ni a, kan sorkar hnuah siamthat hna nasa takin kan thawk a, tun hnaia ZOHANDCO hmasawn dan hian chu chu a lan chian tir hle a ni,” a ti.
Chief minister hi MP pahnih, Richard Vanlalhmangaiha leh K. Laltluangkima te bakah Minister Prof. Lalnilawma leh ZOHANDCO Chairman J.K. Dawngzuala ten an tawiawm a ni.