Co-ordination Committee on Ex-MNA Association leh Peace Accord MNF Returnees Association (PAMRA) te chuan nunna tam tak leh thisena an hlawh chhuah Remna Thuthlung (Memorandum of Settlement) chu sawi dal an phal loh thu leh he thuthlung leh ILP chungchanga chief minister thusawi chu an duh loh hle thu an sawi.
Inrinnia Aizawl Press Club-a thuthar thehdarhtute an kawmnaah an chairman Vanlalbiaa chuan, “Mizoramin Remna Thuthlung kan neih, a rah kan seng mek hi nunna tam tak leh thisena kan hlawh chhuah a ni a. Chief minister-in sawi nep leh sawi dal phet a tum reng ta mai hi thinrimthlak kan ti a, Remna Thuthlung hmang thiam lo leh hmang ngam lo a nih chuan thuneihna a chan mek hi mi dang kutah hlan mai se tih hi hnam sipaiten kan duh dan a ni,” a ti.
Pawl pahnih hruaitute chuan Remna Thuthlunga hming ziaktute hi MNF aiawhin Laldenga (President), India sorkar aiawhin R.D. Pradhan (Home Secretary, GoI) leh Mizoram sorkar aiawhin Lalkhama (Chief Secretary, GoM) te an nih thu sawiin, inremna hi Mizoram leh India sorkar inremna ngei a ni tiin an sawi a. Thu bul chang 8-naah Inner Line Regulations (ILR) tuna Mizoram hman mek hi Mizoram sorkar rawn lo chuan siam danglam emaw paih emaw theih a ni lo tiin thuthlungah a chuang chiang hle tih an sawi bawk.
Chief minister dinhmuna ding mek chu Mizoram leh hnam himna khawih thila huaisen taka mipuite hmaa ding tura beisei a nih laia, pawn lam atanga nawrna awm si lova ram leh hnam inhumhimna kulh pawimawh tak ‘Central sorkarin a duh chuan min thiahsak thei’ tia a sawi chu vanduaithlak an tih thu an sawi a. Thisen leh nunna senga inhumhimna an hlawh chhuah tawhte tiderthawng zawng leh tibawrhbang zawnga a tang zel chu chief minister dinhmuna ding zel tlakah pawh an ngaih loh thu an sawi.