Aizawl: Electric Veng Badminton Club buatsaih, ‘Pu F. Lianhmingthanga Memorial All Mizoram Badminton Invitation Tournament’ kharna inkhawm chu Inrinni khan Electric YMA Hall-ah neih a ni a, home minister, bialtu MLA ni bawk, K. Sapdanga’n khuallian niin a hmanpui a, lawmman hrang hrang a sem nghal bawk.
Khuallian K. Sapdanga chuan thu sawiin tournament hlawhtling taka buatsaih a ni chu lawmawm a tih thu a sawi a, F. Lianhmingthanga nupui fanaute leh sponsor-tu dang mi 18-te inpekna chu fakawm a tih thu a sawi a. Mizo thalai zinga India ram aiawh pha, Lalthazuala leh Sawmhlua te an awm chu chhuanawm tiin, Mizo thalaite chu hlawhtlinna ropui zawk chang tur leh tha thlah lova tang sauh sauh turin a fuih bawk.
Tournament kharna inkhawm zawh hian Home Minister hian Electric YMA Hall-a Central YMA hnuaia CADS Group No. 4 duty-te a tlawh nghal a, an senso phuhrukna tur financial assistance a hlan bawk.
K Sapdanga chuan tlawmngaia ram leh hnam himna tura YMA duty-te thawhrimna chu thlamuanthlak a tih thu leh sorkar nena thawhho zel a pawimawh thu a sawi.