Aizawl: Inner Line Permit (ILP) chungchanga Chief Minister Lalduhoma thusawi dana an lungawi lohna lantir nan MNF Thalai (Mizo National Youth Front) chuan a zin haw chu pawndum batin an hmuak a. Chief minister erawh a zinna atanga a lo haw programme dangah a kaltlang nghal.
MNF Thalaite hi Inrinni chawhma dar 11:30 atang khan Chief Minister Bangla gate bulah pungkhawmin, an lungawi lohna lantirin pawndum hi an bat hlawm a. Chief minister hi Lengpui thlawhtheihna tumhmun atanga a lo haw hun an nghak a ni.
MNF Thalai hruaitute chuan chief minister zin haw hi ni dang aiin Lengpui thlawhtheihna tumhmunah a chawl rei a. Hun eng emaw chen a bangla gate bula an nghah hnuah bangla-ah lut kawi lovin assembly house-ah programme dang chhim turin a kaltlang nghal a. An nghah chhuah tak loh avangin chawhnu dar 3:30 rik hma deuh khan an tin.
Hetih lai hian punkhawmnaa thu sawiin MNYF President Gogo Lalremtluanga chuan Zoram mipuiin duhsak taka chief minister dinhmuna an dah, Lalduhoma chuan Mizo mipuite harsatna a hre em em tawh tur a nih laia Peace Accord leh ILP chungchanga thalaite rilru hruai kawi thei zawng leh mipui tithlabar zawnga thu a sawi chu pawi an tih thu a sawi a. Kal ngaihna hre lo ZPM kaihhruai sorkar chu khalh ngil tur leh chief minister kawng dik kawhhmuh turin an inpeih reng thu a sawi.