Zo Re-Unification Organisation (ZORO) buatsaihin Inrinni khan khawvel puma Tualto Hnamte Ni (International Day of The World’s Indigenous Peoples) chu Aizawl Vana pa Hall-ah hman a ni a, Art & Culture Minister C. Lalsawivunga’n khuallian niin a hmanpui.
International Day of The World’s Indigenous Peoples hi a ni tak hi August 9 (Pathianni) a nih avangin Aizawlah chuan Inrinni khan hman a ni a. Hnam Ni hmang hian chawhma dar 11 khan Millennium Centre tual atangin Vana Pa Hall thleng ‘Insuihkhawm duhna kawng zawh’ neih a ni.
Kawngzawhnaah hian zirlai thahnem tak an tel a, Mizo hnam peng hrang hrang thuam inbelin Mizo hnam identity leh inpumkhatna an lantir a ni.
Kawngzawhtute hi insuihkhawm leh rorelna pakhat hnuaia awm an duh thuin an aurual a ni.
Kawng zawh zawh hian Vana Pa Hall-ah Tualto Hnamte Ni hmanna inkhawm chhunzawm a ni a. Khuallian chuan, “Political boundary-in Zo fate min then hrang mah se kan thinlung erawh a then hrang ve lo va. Zo fate inpumkhatna kawng zawh kan neih tak khan min tipumkhat se, lungrual taka kan insuihkhawm hun tur hi nghakhlel takin kan thlir a ni,” a ti a. Zo fate inpumkhatna kawnga ZORO hmalakna pawh tluang taka a kal theih nan duhsakna a hlan nghal bawk.
Tualto Hnamte Ni hmanna inkhawm hi ZORO Vice President L. Ramdinliana Renthlei-in a kaihruai a. President R. Sangkawia pawhin thu sawiin Zo hnam zawng zawng lungrual taka insuihkhawm a, siamtuin an tana Zoram thar a dah chu luah tura thu dik tan chhana an din chhuah ngei a beisei thu a sawi.
Inkhawmah hian Hachhek bialtu MLA Robert Romawia Royte leh Adviser to Chief Minister Lalmuanpuia Punte te pawh telin thu an sawi a ni.
Tualto Hnamte Ni hmannaah hian zirlai thahnem tak telin Mizo hnam peng hrang hrang 48-te hnam thuam leh hnam lâm hrang hrang entir a ni bawk.