NT Lalbiakkima’n fiahna hran a mamawh tawh lo tih sawiin Mizoram Labour Link LPS Pro Fight-ah tel a tum lo va, professional boxing-ah erawh thlen san ngei tumin a inbuatsaih.
Kum 30 mi, Biakkima hi kum 2014 khan a vawi khat nan Pro Fight lightflyweight-ah telin kum 17 mi ni chungin a champion nghal a, kum 2019 thleng a zawna tum nga a champion hnuah professional a luh chilh a ni.
Kum 2023 khan kir lehin flyweight title fight-ah harsa takin Vanlalenkawltira a hneh a, hei hi professional inhnek chhinchhiahna boxrec-ah ziah luh a ni.
Johnkenty Vanhlimpuia nen tum nga title la thei leh champion hnem ber an nih dunna kalsanin vawi ruk champion thei awm chhun leh Pro Fight chanchina boxer hlawhtling ber ni chungin championship a thlah liam a ni.
Hemi hnu hian harsatna hrang hrang avangin boxing a chawlhsan reng a, kum hnih leh thla riat chuang a awl hnuah thla hmasa khan The Punch professional boxing event, Greater Noida, Uttar Pradesh-ah a inhnek leh a; Nepali boxer Lal Prasad Upreti hnehin mumal taka chhunzawm turin a inpuahchah chhunzawm a ni.
Biakkima hian September 8-a tan tur Pro Fight vawi 12-naah tel a tum lo tih a sawi a, champion hnem ber a ni tawh avangin a tawk viau tawh a, mi dangte ken a tha tawh zawk tih a sawi.
Siaha boxer hian boxing chawlhsan mai erawh a tum lo va, trainer Lalrinhlua hnuaiah HB Boxing Academy, Edenthar, Aizawlah a inbuatsaih reng tih sawiin, November khian The Punch show-ah a inlan leh dawn a, WBC Asia title chuh tumin hma an la mek a ni.
Tun tum Pro Fight title fight neih zawh a nih hnuah LPS Promotion chuan zan khat awh professional boxing buatsaih chhunzawm a tum a, hetah hian Biakkima hi inlan tur zinga beisei a ni a, inbiak fel erawh a la ni lo.
Pro Fight hnuhnung ber, kum 2024 khan flyweight champion lai, Biakkima a tel loh avangin a kalsan champion kawnghren an inchuh a, Tuipui boxer Lalrinngheta’n rochunin title fight-ah a hma kuma Biakkima hmaa tlawm tawh Enkawla a hneh a ni.