Aizawl: Mizoram Pradesh Congress Committee (MPCC) Executive Meeting chu Thawhtanni khan Congress Bhavan-ah MPCC Sr. Vice President Lalnunmawia Chuaungo kaihhruainain neih a ni a. Council of Churches in Mizoram (CCM)-in vawiina Foreign Contribution Regulation (Amendment) Bill 2026 dodalna kawngzawh a huaihawt tur chu a thlawp thu an puang a, resolution an pass bawk.
MPCC chuan CCM-in kawngzawh a buatsaih tur hi tha a tih piah lamah a thlawp tlat thu tar langin, Congress party mi leh sa zawng zawng te pawh he kawngzawhnaah hian tel theuh turin an ngen leh an sawm a ni.
Party hruaitute chuan BJP leh RSS te thil tum lian ber chu Hindu lalram din a nih avangin, Kristian-ten ram pawn atanga tanpuina an dawng thin hi an helh em em a, heng pawisa hmang hian tihluihna hmanga sakhua lettir thin nia dik lo taka min puh avanga FCRA dan siamthat tum an ni tiin a takin an lantir a. Kristian-te nekchepna hmanrua atana he dan siamthat an tumna hi nasa takin an dodal zel dawn tih an tar lang.
FCRA Amendment Bill 2026 hi Parliament-a put luh a nih hunah Mizoram MP-te chu bill dodal zawnga thu sawi ngei tur leh, vote lak hunah pawh a dodal zawnga vote thlak tura ngen an ni a. Bill-in hun kal tawh a huam loh tur thu sawi awm mek pawh awmze nei lo a ngaiin, Kristian-te leh NGO-ten ram pawn atanga tanpuina an dawn thin tihbuai leh mi tam tak tanpuina dawng thei tur tikhawlo tura hmalakna a nih avangin a tha lo takzet a ni an ti bawk.
Mizoram mipuiten he bill hi an duh lo a ni tih lantir nana Mizoram sorkar pawhin Special Legislative Assembly Session ko a, a dodalna resolution pass ngei turin MPCC Executive Meeting chuan sorkar an phut zui bawk a ni.