MZP-in MPSC siam that nawrna kawngah pisa kai tur an dan avangin hna lak kal mek leh exam buatsaih turte chu tiamchin awm lova sawn hlat a nih thu MPSC chuan thuchhuah an siam.
Sorkar department hrang hrang hnuaia Group ‘C’ exam hun ruat tawh atana MPSC-in zawhna a siamsak tawhte pawh tun dinhmunah pekchhuah theih a nih tak loh avangin department-te chu zawhna inpekchhuah theih hun lo ngaichang tura ngen an ni a. MPSC examination hall hmanga hnalakna lo neih tum sorkar department-te pawh a tul anga lo insiamrem rih tura ngen an ni bawk.
MPSC pisa kai tur danin a nghawng hnaivai zual a tar lan zingah, Finance Department hnuaia Assistant Audit & Accounts Officer, Assistant Accounts Officer (Treasury), Assistant Accounts Officer (Works) leh Social Welfare, Women & Child Development Department hnuaia Field Facilitator atana Personal Interview (PI) neih mek chu chhunzawm theih a nih tak loh avangin tiamchin awm lova sawn hlat a ni.
August 11 atanga 14, 2026 chhunga Written Examination leh Personal Interview hun lo ruat fel tawhte chu neih theih a nih hmel loh avangin MPSC chuan tiamchin awm lova sawn hlat thu tar langin, boruak awm dan azirin a hun tur hi hriattir leh anih tur thu an sawi a. Chutih rualin, sorkar department hrang hrang hnuaia promotion, regularization leh confirmation atana Departmental Promotion Committee (DPC) neih tura lo ruahman tawhte pawh thulh lailawk a ni bawk.