Colombia chu kum tam tak chhunga lirnghing an tawn nat ber pakhatin sawiin mi 132 vel thi an awm tawh a, emergency puan a ni.
Thi zat hi an pun ngei rin a ni a, in chim karah mi tam tak an tan rin a la ni.
Magnitude 7.4-a na lirnghing hian Thawhtanni zing dar 07:34 (India-a tlai dar 02:04) khan Chocó province-a lei hnuai km 103-a thuk atangin a sawi niin an ram geological service chuan a sawi a. Huam zau tak sawiin Colombia khawthlang lam hmun hla tak thlengin an hria.
Thi tam zawk hi Colombia-a coffee chinna hmunpui, Pereira khawpui leh a chhehvel leh Valle del Cauca bawra mite an ni.
A nghin tanna hi Chocó province-a San José del Palmar khaw bul a ni a; mahse, Mayor León Fabio Marín Moncada-a chuan an khuaah thi leh hliam an awm lo hlauh tih sawiin kawngpui leh thil dang chhia erawh a awm nual tih as awi.
Colombia-a Association of Capital Cities chuan hliam tuar mi 570 vel an awm tawh niin an sawi.
A nghin tanna atanga km 55 vela hla, Pereira khawpuiah chian chhiatna a thleng nasa hle a. Video darhah chuan khawpui lailia Plaza Bolívar (bazarpui) a chim leh a tlusawp lai a lang.
Tual chhung thuneitute chuan khawpui huam chinah hian mi 67 vel thi awmin in 65 a chim niin an sawi a, mi 15 vel in chim karah an tan an la ring.
Khawpui hmun thenkhatah Thawhlehni zing dar 05:00 thleng khan curfew puan a ni.
Pereira atanga chhim lam km 160-a hla, a nghin tanna atanga km 200 chuanga hla, Cali-ah in 32 a chim.
Manizales, Quibdó, Medellín, Chocó leh Valle del Cauca province hmun tam takah thi an awm bawk.
An ram aviation thuneitute chuan Pereira, Manizales, Quibdó, Armenia, Cartago leh Buenaventura-a mite telin thlawhna tumhmun a chhe nual tih an sawi.
An khawpui ber, Bogotá-ah pawh thing leh traffic light-te a insawi nasa hle a, in khite pawh sawi a awm a; mahse, chhe nasa lutuk erawh a awm hlawm lo.
An thenawma Venezuela, Ecuador leh Panama-ah pawh lirnghing hi an hria a. Thla hnih pawh la liam lovah khan Venezuela hmar lam hi lirnghingin sawiin mi 6,300 chuang an thi a ni.
Colombian President Abelardo de la Espriella-a chuan ram pum chhiatna thleng dinhmunah an awm tih sawiin emergency a puang a, hemi hnuaiah hian sum hman tur ruahman tawhte pawh hmun danga hman tura pawh pen theih a ni.
President hian Zirtawpni khan a chanvo a chelh tan chiah a, chhiatna hautak a hmachhawn nghal a. Thite bakah hian chenna in 1,500 chuang chhia a awm bawk.
Ram dang hruaitute pawhin an ngaihven a. US Secretary of State Marco Rubio-a chuan an thlithlai reng tih leh puih an inhuam tih a sawi a. EU chief Ursula von der Leyen-i pawhin an Copernicus satellite chu chhanchhuah hna thawh nan hman mek a ni tih a sawi.
El Salvador President Nayib Bukele-a chuan Colombian mipuite a tawrhpui thu sawiin chhanchhuah hna thawktu tur leh hmanrua thawn a inpeih tih a sawi.