An inrina bawra Arunachal Pradesh atanga tu tih hriat lohten silai an hmeh puahah Assam mi 12 velin hliam an tuar.
Police chuan Thawhtannia Assam-a Dhemaji district-a buaina chhuak hi ram inluahsak chungchang avanga chhuak niin an sawi.
Assam Chief Minister Himanta Biswa Sarma chuan boruak thunun nghal a nih thu leh a daih tawh thu a sawi a. Education Minister Ranoj Pegu chu Arunachal Pradesh sorkar nena inbe tura tih a nih thu leh director general of police leh chief secretary pawh an thenawm state-a an thawhpuite dawr tura tih an ni bawk tih a sawi.
Thuneitu sang pakhat chuan buaina hi Assam-Arunachal Pradesh ramri, Gogamukh revenue circle huam chhunga Mingmang Basti-a thleng niin a sawi a. Police chuan Arunachal Pradesh-a miten Assam chin ram an luah avanga inhnialna chhuak atanga intan niin an sawi a. An hriat theih chinah tu tih hriat loh, ramri lehlama miten Assam-a chengte lam hawiin tum bik nei lovin silai hi an hmet puak niin an sawi.
Hliam tuarte hi Gogamukh Rural Hospital-a lak phawt an nih hnuah an zinga pasarih chu an nat deuh avangin Dhemaji Civil Hospital panpui an ni a, hengho zinga pali hi Assam Medical College & Hospital-ah enkawlna tha zawk dawng tura kaltir leh an ni bawk.
“Ramri hrulah hian venhimna tihkhauh nghal a ni,” tiin sorkar hotu lianin a sawi a. Guwahati bul, Sonapur-a sorkar thiltihnaa hun a hmannaah Sarma chuan Assam-Arunachal Pradesh ramria Dhemaji-ah ‘tual chhung buaina tenau’ a chhuah thu thuthar lakhawmtute a hrilh.
“Sorkar leh sorkar inepna thil a ni lo va, boruak pawh thunun nghal niin buaina pawh tihmih nghal a ni,” a ti a. “Kan DGP pawh lehlam DGP be tura tih niin chief secretary pawhin Arunachal Pradesh sorkar a be nghal bawk,” a ti.
Assam leh Arunachal Pradesh hian ramrim km 804.1-a thui neiin hmun 1,200 velah ram inchuhna a awm a. Assam sorkar hian July 29 khan an state assembly rorel inkhawmah Arunachal Pradesh-in an ram hectare 16,144.01-a zau an luah thu leh heng zinga sq km 858.91 chu an ta nia an chhal thu a lo tar lang tawh.
Thuneitute chuan ramri ching fel tur hian regional committee 12 dinin an rawtna angin hma lak a ni a. Namsai Declaration an tih chu July 15, 2022 khan chief minister pahnihin ziakin hei hi Arunachal Pradesh-in an ta nia Assam-a khaw 123 an chhal chin felna tur a ni.
A hnu, April 20, 2023 khan chief minister pahnihte hian New Delhi-ah MoU an ziak leh bawk a. Thuneitute chuan khaw 123 zinga 71 hi an ching fel tawh a, khaw 52 chungchangah indawrna kalpui mek zel a ni tih an sawi.
Arunachal Pradesh hi India-in zalenna a neih tirh khan mahni inrelbawla awm an ni a, union territory an nih hnuah kum 1987 khan state an ni leh a. State a nih khan committee-in a rawt angin Assam ram eng emaw zat Arunachal Pradesh-ah rin luh a ni a. Assam chuan hei hi duh lovin Supreme Court-a ngaihtuah lai mek a ni nghe nghe.
Dhemaji-a silai puaka hliam pawh eng emaw zat an awm hian tun hma atanga ramri buai boruak a siam thar hlauhna siamin sorkar pahnihte hi an indawr a, venhimna pawh khauh takin an kalpui nghal a ni.