Aizawl: PWD-in Kulikawn (Ngaizel) phei a lung tla then fai hna an thawh dawn avangin Nilaini atanga hna thawh zawh a nih hma loh chuan helai kawng hi khar rih a ni dawn.
Aizawl Traffic SP C. Vanlalvena thuchhuah tar lan danin, PWD Aizawl Road South Sub-Division-IV ngenna angin MV Act, 1988 Section 115-na in thuneihna a pek hmangin he thupek hi chhuah a ni.
Kawng hi ni tin zing dar 10 atanga tlai dar 5 inkar chhun lamah khar a ni thin ang a, PWD-te hian hna an thawh zawh phei chuan kawng hi tlang taka hman chhunzawm a ni leh ang.
SP Traffic chuan kawng hman tum mipuite chu he thupek hi zawma kawng dang hmang zawk tur leh inruahmanna lo siam lawk theuh turin mipui a chah.