Aizawl: Mizo historian B. Lalthangliana chuan Mizo history leh thu leh hla a zirna kawng hrang hranga lehkhabu leh thil hlui a lo lakkhawmte chu Thawhlehni khan Government Hrangbana College kutah a hlan a. Heng thil hlui dahkhawmna inhlanna leh hawnna hun hi College Library, Archive Room-ah hman a ni.
Hrangbana College-a kum 24 chuang lo thawk tawh leh Mizo thu leh hla tihhausakna kawnga sulhnu ropui tak hnutchhiahtu B. Lalthangliana chuan Mizo history zir chiang tura bul a tan dante a sawi a. Culture nena inzawm thil hlui leh thil hlu a lo lakkhawmte chu uluk zawka vawn that a nih zel theih nan Hrangbana College Archive hnenah phal takin a hlan thu a sawi.
Heng thil hlui pawimawhte inhlanna lehkha hi H. Lalthanpuii, Associate Professor leh Archive Committee Chairman ni bawk hnenah a hlan a ni.
MAL Book of the Year chawimawina tum hnih dawng tawh B. Lalthangliana pual Corner-ah hian Mizo tawng, Kâwl tawng leh Sap tawng thlenga inziak, Mizote tana document pawimawh tling thei tur leh tun huna hmuh tur awm tawh lo lehkhabu hlu tak takte bakah, a lehkhabu kut ngeia a ziahte dah a ni.
Heng document-te hi history, culture leh literature huanga research tite tana hmanraw tangkai tak tur a nih angin, Hrangbana College zirlai leh thawktute bakah a duh apiang tan hman tangkai theih a ni ang.
He hunah hian B. Lalthangliana te nupa bakah Principal, Vice Principal, Mizo Department zirtirtute leh zirlai thenkhatte an tel a ni.