ZPM Aizawl North II block-in thuchhuah siamin, AMC Ward III chhunga awm Local council chairman 5 (MNF party mi vek) ten ni 18.3.2022-a thuchhuah an siamah AMC Ward III bialtu councillor C. Lalchhandami’n a mimal hamthatna leh politics khelhna bakah ama duh dan chauhvin AMC property tax a hmang thin niin an tarlang tih sawiin, hei hi thu belhchiandawllo leh intihhmingchhiat tumna a nih thu an sawi.
AMC Ward III chhunga awm LC chairman 5 te hian thuchhuah an siam dawnin LC member te inrawnkhawmna a awm lo niin ZPM Aizawl North II block chuan an sawi a. “AMC Ward-III Local Council Joint resolution anga thuchhuah an siam ta mai hi mipui thlan ve tho, LC te zahlohna leh inthamlohna lian tak a nih bakah kalphung dik taka hmalakna kalpui a nih laia sawiselna tur an zawng tlat hi mak kan ti hle a ni” an ti.
ZPM Aizawl North II block chuan kumin, January 19, 2022 khan AMC Ward-III committee thutkhaw- mah LC aiawh 2 chauh an kal nia sawiin, “Ward committee hian hna 4 thawh tur an rel ang thlapin bialtu councillor chuan property tax atanga an pawisa dawn chu mipuite tan a hmang” an ti a. “Ward committee hi mumal takin an lo la kalpui ngai loh bakah AMC hnuaia property tax atanga hnathawh tur hi LC te kuta pek tur a nih thu dana ziahlan a nih loh avangin bialtu councillor hian Ward committee thu angin a kalpui a, chumi hrethiamlo chuan heti hian thuchhuah an siam ta mai niin a lang” an ti bawk.
AMC Ward III bialtu councillor C. Lalchhandami hnathawh dan chu a langtlanga, ward mipuite tan a chhenfakawm niin ZPM Aizawl North II block chuan an sawi a. “Ward mipuite pawhin an fak mek laia, Ward chhung LC chairman ten Joint resolution lem hmanga thubelhchiandawllo an chhuah ta mai hi thil an hriatthiamloh vang leh tihhmingchhiat an tumna ni ngeiah kan ngai” an ti bawk a ni.
Hetih lai hian Inrinni khan AMC Ward III bialtu councillor C. Lalchhandami chuan kum 2021 – 2022 property tax return hmanga Ramhlun North market building-a vantlang inthiarna (public toilet), hun rei tak chhung hman theih tawh loh, ODF plus standard a siamthar chu a hawng bawk.