Aizawl: Serchhip district thuneitute leh Serchhip district MJA chuan NHIDCL hnuaia Shivalaya Construction Ltd. leh KRAM Infracon Pvt. Ltd. ten National Highway 54 (Khumtung atanga Keitum inkar) kawng an repair mek chu Nilaini khan an enfiah. He enfiahnaah hian KRAM Infracon Pvt. Ltd. hnathawh chu a muan bakah a chhe hle nia hriat a ni. Quarry lung ni lo truck trip nga an paihtir bawk.
Serchhip district thuneitute leh MJA te enfiahna atanga a lan danin, Phase-I (Khumtung leh Baktawng Mualkawi inkar 5km) thawktu Shivalaya Construction Ltd. hnathawh chu a tha thawkhat hle a, kumin fur chhunga an kawng siam chhia zaa 5 vel pawh an repair zo fel khat hial tawh a ni. Keitum leh Bungtlang inkar (Phase-III) thawktu Bhartia Infra Projects Ltd. kawng siam pawh sawisel tur leh repair ngai a awm lo thung.
Chutih rualin, Phase-II (Baktawng Mualkawi via Serchhip By-Pass Road to Keitum inkar) siamtu KRAM Infracon Pvt. Ltd. hnathawh erawh a chhe hle a, kumin furah an kawng siam sa zaa 80 aia tam repair ngaiin a chhia a ni. Hei hi an lung hman quality a that tawk loh vang nia hriat a ni a, leiminna hmun atanga an lak lung, quarry lung ni lo tih hriat hmun ngaa an chhekkhawl sa (Truck trip nga) chu paihtir lehnghal an ni.
He endik hna hi Chawngthu Lalrinhlua, SDC leh MJA President Kapliana Pachuau ten an ho a. NHIDCL aiawh Ram Niranjan Parsad (Resident Engineer) leh Jiten Raut (Field Engineer), bakah KRAM Infracon PRO Lalhruaitluanga te an tel bawk.
August 7, 2026 khan NHIDCL chuan KRAM Infracon Pvt. Ltd. hi warning pein, ni 15 chhung (August 22 ral hma)-a lirthei kal theih tura kawng chhia repair zo vek turin hriattirna an lo pe tawh a. Serchhip DC Paul L. Khuma pawhin a tul dan a zira an chunga legal action lak buatsaih tura a lo vaukhan tawh bawk a ni.