Aizawl: Planning & Programme Implementation Conference Hall-ah Nilaini khan Chief Minister Lalduhoma hovin Mizoram State Policy Coordination Committee an thukhawm a, ‘Bana Kaih’ (Handholding Scheme) kalpui tawh chinte thlirletin hmalak zel dan tur an sawiho.
Handholding Scheme CEO Lalfakzuala chuan CM Special Package Phase 1-ah progress partner 2,255 hnenah Rs vbc 18.33 hman a nih tawh thu leh Phase 2-ah progress partner 3,113 thlan tawhin Rs vbc 4.25 senna tur a nih thu a sawi.
Committee chuan Phase 3 kalpui vat a nih tawh dawn avangin dilna la endik fel loh (pending) 2,135 a awm mekte leh sum la pek kim lohte chu a rang lama um zui leh pek chhuah nise an ti.
Loan component bikah progress partner 742 thlan tawh zingah mi 482 hnenah loan Rs vbc 44.05 pek chhuah a ni tawh a. Bank-te zingah Mizoram Rural Bank (MRB)-in partner 314 hnenah Rs vbc 23.98 pein a pe hnem ber a, SBI (partner 104, Rs vbc 9.48) leh MCAB (partner 59, Rs vbc 10.20) ten an dawt a ni. Loan punna rulhsakna atan tum hnihah Rs vbc 1.12 aia tam hman a ni tawh bawk.
Mizoram sorkar leh NABARD thawhdunna hmangin Serchhip district-a khaw pasariha progress partner 500-te tana Rs nuai 625.45 project kalpui mek a ni bawk.
Committee hian Handholding Phase 3-a inkaihhruaina leh kalphung siam rem turte, media & publicity hmalakna tur leh postal department atanga rawtna lutte an sawiho nghal.
Thutkhawmah hian minister – C. Lalsawivunga, Lalthansanga, PC Vanlalruata, F. Rodingliana leh Lalnghinglova Hmar te bakah Adviser to CM (Handholding) Dr. K.C. Lalmalsawmzauva, committee member-te leh sorkar thawhpui bank aiawhte an tel a ni.